Son günlər mobil rabitə bazarının lideri olan Azercell şirkətinin tətbiq etdiyi yeni tarif və xidmət qaydaları geniş ictimai narazılığa səbəb olub. Abunəçilər tərəfindən sosial mediada, müxtəlif platformalarda və telekanallarda səsləndirilən narahatlıqlar göstərir ki, dəyişikliklər təkcə qiymət artımı ilə məhdudlaşmır, həm də mövcud şərtlərin abunəçi maraqları ilə ziddiyyət təşkil etdiyini ortaya qoyur.

Yeni qaydalar nəyi dəyişdi?

Azercell-in elan etdiyi qaydalara əsasən, xəttin açıq qalma müddəti artıq balans artırımı ilə deyil, tarif paketinin aktivləşdirilməsi ilə müəyyən olunacaq. Bu isə o deməkdir ki, əvvəlki illərdə balansını 5, 10 və ya 25 AZN artıran abunəçilər, xəttlərini müvafiq olaraq 30, 60 və 90 gün açıq saxlaya bilirdilərsə, yeni sistemdə bu müddətlər ciddi şəkildə azaldılıb. Məsələn, artıq 10 AZN balans artırımı abunəçiyə cəmi 10 gün aktivlik təqdim edir, yalnız tarif yenilənərsə, xətt 30 gün açıq qalır.

Bu isə geniş istifadəçi kütləsi üçün əhəmiyyətli bir dəyişiklikdir. Xüsusilə də az istifadə edən və yalnız lazım olduqda balans yükləyən şəxslər üçün bu sistem onların seçimini və istifadə rahatlığını məhdudlaşdırır.

Mətbuatda verilən açıqlamalar və reallıq

Azercell-in Müştəri Xidmətləri Departamentinin rəhbəri Faiq Dadaşov bir neçə yerli telekanalda verdiyi açıqlamalarda bildirir ki, guya bu dəyişikliklər abunəçilərin xeyrinədir və əvvəl 2 AZN yükləyən abunəçi yalnız 10 gün xəttindən istifadə edə bildiyi halda, indi bu müddət 30 gün olacaq. Lakin bu müqayisə yalnız spesifik halları əhatə edir və ümumi sistemdə baş verən ciddi dəyişiklikləri kölgədə qoyur. Əvvəllər 10 AZN balans yükləməklə 60 gün istifadə hüququ olan abunəçilər indi eyni məbləğlə cəmi 10 gün təminat alacaqlar – bu isə faktiki olaraq 6 dəfəlik fərq deməkdir.

İnternet paketlərindəki dəyişikliklər

Bundan başqa, internet xidmətlərində də əhəmiyyətli dəyişikliklər baş verib:

6 saatlıq və Həftəsonu limitsiz internet paketləri ləğv edilib.

1 saatlıq və 3 saatlıq limitsiz internet paketlərinin qiymətində təxminən 60%-lik artım baş verib.

Gündəlik internet paketləri də 40%-ə qədər bahalaşıb.

Aylıq paketlərin istifadə müddəti isə 30 gündən 28 günə endirilib – bu da istifadəçini il ərzində faktiki olaraq 13 dəfə ödəniş etməyə məcbur edir.


Bundan əlavə, əvvəllər WhatsApp yazışmaları üçün təqdim edilən 1GB-lıq pulsuz trafik də ləğv olunub.

Tarif seçiminin məhdudlaşdırılması

Ən azı 2 AZN-lik aylıq abunə haqqı olan tariflər də aradan qaldırılıb. Hazırda yalnız 10 AZN və daha yüksək abunə haqlı tariflər təqdim olunur. Bu isə o deməkdir ki, istifadəçi az miqdarda danışıq və internet ehtiyacı olsa belə, məcburi şəkildə daha yüksək məbləğli paketlərə yönəldilir.

Abunəçilər nə istəyir?

Bu dəyişikliklər fonunda bir çox abunəçi Azercell-in qərarlarını yetərincə əsaslandırılmamış, ictimai ehtiyaclarla uyğunlaşdırılmamış və alternativsiz təqdim olunmuş hesab edir. Abunəçilər arasında səsləndirilən əsas tələblər bunlardır:

- Əvəlki balans əsaslı sistemin bərpası və ya alternativ mexanizmlərin təqdim edilməsi.

- Tarif və paketlərin daha çevik və tələbatayönümlü olması.

- İctimai rəyin nəzərə alınması və daha şəffaf kommunikasiya aparılması.

- Digər operatorlarla qiymət və xidmət müqayisələrində abunəçinin seçim azadlığının dəstəklənməsi.

Sosial şəbəkələrdə çoxsaylı istifadəçilər Mobil Nömrələrin Daşınması (MND) xidməti vasitəsilə nömrələrini digər operatorlara keçirməyə başladığını bildirir. Bu isə şirkət üçün yalnız abunəçi itkisi deyil, həm də ictimai etibarın sarsılması deməkdir.

Azercell-in ölkənin mobil rabitə bazarındakı mühüm mövqeyinə və texniki imkanlarına baxmayaraq, son dövrdə həyata keçirdiyi dəyişikliklərin geniş ictimai narazılığa səbəb olduğu açıq görünür. İctimaiyyət bu məsələlərdə daha şəffaf, ədalətli və abunəçi mərkəzli yanaşma gözləyir.

Əgər şirkət bu narazılıqları nəzərə almazsa, alternativ operatorlara keçidlərin artması və daha ciddi etimad böhranı ilə qarşılaşması mümkündür. Unutmayaq ki, bazarda rəqabət yalnız qiymət yox, hörmət və şəffaflıq üzərində də qurulur.

BAKUNEWS.az