Tərtər Rayon Mərkəzi Xəstəxanasının direktoru Sərxan Cəlahani və Bərdə Rayon Mərkəzi Xəstəxanasının direktoru Vüsal Məmmədov barədə sosial mediada yayılan çoxsaylı şikayətlər ictimai narazılığın pik nöqtəyə çatdığını göstərir.

Ən ağrılı məqam isə odur ki, bu şikayətlərin əksəriyyəti şəhid və qazi ailələri tərəfindən səsləndirilir. Öz canını, övladını bu vətənə qurban verən ailələr həkim laqeydliyi və idarəçi saymazlığı ilə qarşılaşırsa, artıq bu, təkcə tibbi xidmət problemi deyil – bu, etik və hüquqi fəlakətdir.

Sual yaranır: TƏBİB bu şikayətlərdən xəbərsizdirmi? Prezident Administrasiyasına göndərilən çoxsaylı müraciətlər niyə cavabsız qalır? Yoxsa Sərxan Cəlahani və Vüsal Məmmədov bu postlar üçün əvəzedilməz hesab olunur?

Cəmiyyətin tələb etdiyi çox sadədir:

- Vəzifəli şəxslər xalqa xidmət etməlidirlər, onları aşağılamağa, təhqir etməyə deyil.
- Qazi və şəhid ailələri üçün xəstəxanalar ümid yeri olmalıdır, psixoloji sarsıntı mənbəyi yox.

Buradan Prezident Administrasiyasının rəhbəri Samir Nuriyevə və TƏBİB sədri Vüqar Qurbanova açıq müraciət edirik:

Bu iki direktorun fəaliyyətinə hüquqi və inzibati qiymət verin. Şikayət edən sadə vətəndaşları, xüsusilə, şəhid ailələrini dinləyin. Onların səsini eşidin.

Qeyd: Sosial şəbəkələrdə yayımlanan videomateriallar, açıqlamalar və faktlar yetərincədir. Əlavə araşdırma üçün kifayət qədər ictimai sübut mövcuddur.

İctimaiyyətin gözləntisi sadədir: Şikayətlərə biganə qalmayın.

Bakunews.az məsələni diqqətdə saxlayır.