Son günlər sosial mediada vətəndaş Ayvazlı Lalə Abbasəli qızının səhhətində həkim səhlənkarlığı nəticəsində yaranmış problemlərlə bağlı yayılan məlumatlar ictimai rezonans doğurub. Lalə Ayvazlı iddia edir ki, onu 2022-ci ildə “Kəpəz” Hospitalda əməliyyat edən Səkinə Xudiyeva adlı həkim saxta plastik cərrah sənədi ilə illərlə fəaliyyət göstərib.

Lalə Ayvazlının sözlərinə görə, əməliyyat öncəsi heç bir tibbi müayinədən keçirilmədən narkoz verilmiş, nəticədə ağır qanaxma baş vermiş və o, 10 saatlıq koma vəziyyətinə düşmüşdür.

Sonradan məlum olub ki, həmin vaxt S.Xudiyeva eyni anda iki xəstəni əməliyyata alıb. “Məni tələsik narkoza saldılar. Əməliyyatdan sonra ayılanda vəziyyətimin çox ağır olduğunu dedilər. Sonradan bildim ki, bu həkim eyni anda iki pasiyent üzərində əməliyyat aparıb,” – deyə Lalə Ayvazlı bildirir.

Hadisə ilə bağlı ilkin araşdırma Nəsimi rayon prokurorluğunda, daha sonra isə Yasamal rayon prokurorluğunda aparılıb.
Lakin vətəndaşın sözlərinə görə, bu mərhələlərdə araşdırma qeyri-obyektiv şəkildə aparılıb.
Yalnız Baş Prokuror Kamran Əliyev və onun birinci müavini Elçin Məmmədovun qəbulundan sonra məsələ yenidən diqqətə götürülüb və bir neçə dəfə prokurorların qərarları ləğv edilərək əlavə araşdırma aparılması tapşırılıb.

Bu mərhələdə Baş Prokurorluq və Səhiyyə Nazirliyinin birgə komissiyası yaradılıb. Komissiyanın üzvlərindən biri, Baş Prokurorluğun İstintaqa Nəzarət Şöbəsinin əməkdaşı Eyyub Bəşirov da prosesdə iştirak edib. Nəticədə məlum olub ki, Səkinə Xudiyeva plastik cərrah ixtisası üzrə saxta sənədlərlə fəaliyyət göstərib.

Aparılmış yoxlamalardan sonra Səhiyyə Nazirliyi tərəfindən S.Xudiyevanın vəzifədən azad olunması barədə əmr imzalanıb. Lakin Lalə Ayvazlının təqdim etdiyi faktlar göstərir ki, Xudiyeva bu qərardan sonra da fəaliyyətini dayandırmayıb.

Onun “Badam” klinikasında yenidən fəaliyyət göstərdiyi, əməliyyatlarının görüntülərini isə TikTok sosial platformasında paylaşdığı müəyyən edilib. Paylaşımlarda klinikanın adı və əlaqə nömrəsi (070 342 13 50) açıq şəkildə göstərilib.

Lalə Ayvazlı bildirir ki, həmin nömrə ilə əlaqə saxladıqda klinikanın ictimaiyyətlə əlaqələr şöbəsi “Səkinə xanım bizdə çalışır, Səhiyyə Nazirliyi icazə verib” cavabını verib. Daha sonra artan şikayətlərdən sonra isə klinika bu məlumatı təkzib edib. “Bir dəfə dedilər ki, bəli, gəlir xırda əməliyyatlar edir, sonra da dedilər, artıq işləmir. Amma paylaşımlar açıq şəkildə klinikanın adından edilir,” – deyə şikayətçi qeyd edir.

Lalə Ayvazlı bildirir ki, məsələ ilə bağlı Vitse-prezident Mehriban Əliyeva və Prezident Administrasiyasının əməkdaşı Fərəh Əliyeva tərəfindən iki dəfə qəbul edilib. Onun müraciətləri əsasında həm Səhiyyə Nazirliyinə, həm də Baş Prokurorluğa məktublar göndərilib.

Buna baxmayaraq, Səbail rayon prokurorluğuna yönləndirilmiş materiallar üzrə hələ də ciddi tədbir görülmədiyi bildirilir. “Vitse-prezidentdən gələn məktuba belə reaksiya yoxdur. Görünür, Səbail rayon prokurorluğu məsələni hələ də ciddiyə almır,” – deyə Ayvazlı vurğulayır.


Vətəndaş əlavə olaraq Dövlət Təhlükəsizlik Xidmətinə də müraciət edib. DTX-da da qəbulda olduğunu, müraciətinin lazımi orqanlara göndərildiyini bildirib.

Lalə Ayvazlı sonda qeyd edir:

“Baş Prokuror Kamran Əliyev və Elçin Məmmədov mənim işimdə ədalətin bərpası üçün addım atıblar. Amma aşağı səviyyədə bəzi prokurorlar və klinika rəhbərləri bu qərarları görməzdən gəlirlər. Heç bir müstəntiqin və ya həkimin ixtiyarı yoxdur ki, Birinci xanımın göndərdiyi məktubu belə dəyərsiz saysın.”


Baş Prokurorluğun mətbuat xidmətindən hadisə ilə bağlı hələlik yeni açıqlama verilməyib. Lakin mövcud sənədlər, əmrlər və vətəndaşın təqdim etdiyi sübutlar göstərir ki, məsələ ciddi şəkildə yenidən gündəmə gətirilə bilər.