Sumqayıt şəhəri, Saray bağları, Qurd dərəsi massivi, Sülh küçəsi (7–8-ci dayanacaq arası) ərazisində yaşayan sakinlər Azəriqaz İstehsalat Birliyinin fəaliyyəti ilə bağlı ciddi narazılıq edirlər. Sakinlərin bildirdiyinə görə, eyni qaz xətti üzərində yerləşən bəzi yaşayış evlərinə qaz verildiyi halda, digərləri artıq bir aydan çoxdur tamamilə qazsız saxlanılır.

Məlumata görə, sözügedən ərazidə ümumilikdə 20 yaşayış evi mövcuddur. Həmin evlərdən 15-nə zəif də olsa qaz verilir, lakin eyni xətt üzərində yerləşən 5 yaşayış evinə 2025-ci ilin dekabr ayının əvvəlindən etibarən ümumiyyətlə qaz təchizatı dayandırılıb. Bununla bağlı sakinlərə indiyədək heç bir rəsmi, hüquqi və ya texniki izahat təqdim edilməyib.

Bakunews.az-a müraciət edən sakinlər bildirirlər ki, ötən il ərzində həmin ərazidə qazla bağlı heç bir problem olmayıb. Qaz xəttinin işlək olduğu isə digər abonentlərə qaz verilməsi ilə açıq şəkildə sübut olunur. Qazsız qalan evlərin heç birinin borcu yoxdur, bütün ödənişlər vaxtında və tam şəkildə həyata keçirilib. Buna baxmayaraq, konkret olaraq bu evlərin seçilərək qazsız saxlanılması açıq-aşkar ayrı-seçkilik və vəzifə səlahiyyətlərindən sui-istifadə kimi qiymətləndirilir.
Problemlə bağlı sakinlər dəfələrlə Azəriqazın 104 qaynar xəttinə müraciət etsələr də, hər dəfə “qeydə alındı”, “nümayəndə baxacaq”, “reyd aparılır” kimi formal cavablar verildiyi, lakin real nəticənin olmadığı bildirilir. Son müraciətlərdən sonra da saatlarla, hətta gecə yarısına qədər qaz təchizatının bərpa olunmaması sakinlərin narazılığını daha da artırıb.

Qazsız qalan evlərdə azyaşlı uşaqların, yaşlıların və ağır xəstə insanların yaşadığı qeyd olunur. Qış aylarında evlərin qızdırılmaması isə insanların sağlamlığı və həyatı üçün ciddi təhlükə yaradır. Sakinlərin sözlərinə görə, axşam saatlarında evlərdə minimal yaşayış şəraitinin belə olmaması sosial baxımdan yolverilməzdir.

Sakinlər hesab edirlər ki, baş verənlər istehlakçı hüquqlarının kobud şəkildə pozulması, dövlət qurumları əməkdaşlarının etik davranış qaydalarına ziddir və qanunvericiliyin tələblərinə uyğun gəlmir. Onlar qazın seçici şəkildə verilməsinin səbəblərinin rəsmi və yazılı formada izah edilməsini, məsul şəxslər barəsində tədbir görülməsini və qaz təchizatının dərhal bərpa olunmasını tələb edirlər.

Qeyd edək ki, sakinlər problemlə bağlı nəticə əldə olunmayacağı təqdirdə məhkəməyə, Ombudsmana və digər aidiyyəti dövlət qurumlarına müraciət edəcəklərini bildirirlər.

Rəsmi açıqlamada Azəriqaz İstehsalat Birliyi bildirib ki, Qeyd olunan ərazidə qaz tənzimləyicidə sızma halı aşkar edilib və 08.01.2026-cı il tarixində yenisi ilə əvəzlənib.