Azərbaycan Prezidenti İlham əliyevə açıq məktubunda Azərbaycan Beynəlxalq Bankının keçmiş prezidenti Cahangir Hacıyevin bacısı Amin Hacıyeva Bank Olmayan Kredit Təşkilatı Agrarkredit tərəfindən mənzilin və bağ evinin ələ keçirilməsinin qarşısını almaq üçün kömək istəyib.

Aqrarkredit Azərbaycan Beynəlxalq Bankının zəhərli aktivlərinin idarə edilməsindən məsuldur və dövlət şirkəti kimi hazırda ABB-nin kreditlərinin ödənilməsi uğrunda mübarizə aparır.

O, İlham Əliyevə müraciətində yazır:

Hörmətli cənab prezident!
Mən yenə də kömək üçün sizə müraciət edirəm.

Yaşlı vaxtımızda bizi evsiz qalmaq təhlükəsi gözləyir.

Cahangirin mənim də yaşadığım mənzildən və bağdan başqa heç nəyi yoxdur.

Lakin “Aqrarkredit”

1) Mülki Məcəlləni;
2)”İcra Məcəlləsini;
3) Konstitusiya Məhkəməsi Plenumunun qərarını;
4) Ali Məhkəmə Plenumunun qərarını pozaraq son yaşayış yerimizi əlimizdən alır.

Bu, Cahangirin yeganə yaşayış yeridir və 90-cı illərin ortalarında alınıb. Azərbaycan qanunlarına əməl edilməsilə bağlı mənim bütün cəhdlərimə işarə edirlər ki, bu, yuxarının göstərişidir. Mən heç zaman inanmaram ki, qardaşımın yeganə yaşayış yerinin əlindən alınması sizin göstərişinizdir.

Mən qəti əminəm ki, bu hərəkətlər “Aqrarkredit”dən və onunla əlaqəli təşkilatlardan qaynaqlanır. Odur ki, bu ağır vəziyyətdə bizə kömək etməyinizi xahiş edirəm.

Onu da diqqətinizə çatdırmaq istəyirəm ki, son bir ildə Cahangirin səhhəti pisləşib, xroniki xəstəlikləri kəskinləşib, tez-tez tutmaları olur.

Eyni zamanda ixtisaslı həkimlərin onun yanına buraxılması ilə bağlı bütün cəhdlərim və müraciətlərim nəticəsiz qalıb.

Hörmətli cənab prezident, mən sizin humanistliyinizə inanıram və sizdən kömək istəyirəm. (Gununsesi.info)