Yeni tədris ilinə hazırlıq məqsədilə Abşeron–Xızı Regional Təhsil İdarəsinin rəhbərliyi Sumqayıt, Abşeron və Xızı rayonlarının təhsil müəssisələrinin rəhbərləri ilə görüş keçirib. Görüşdə həm idarə əməkdaşları, həm də məktəb direktorları iştirak ediblər.

Tədbiri idarənin müdiri İlhamə Abdullayeva açaraq ötən tədris ili ərzində görülən işlər barədə təqdimatla çıxış edib və qarşıdakı dövr üçün əsas hədəf və prioritetləri açıqlayıb. Daha sonra idarə rəsmilərindən Aynur Rüstəmova qarşıya qoyulan vəzifələr və keyfiyyətin yüksəldilməsi üçün tətbiq ediləcək yanaşmalar barədə təqdimatla çıxış edib.

Görüşdə müzakirəyə çıxarılan əsas mövzular arasında rəqəmsal bacarıqların artırılması, dərsə davamiyyətin yüksəldilməsi, inklüziv təhsilin gücləndirilməsi, oxuyub-anlama və riyazi təfəkkürün inkişafı kimi təhsilin aktual problemləri yer alıb. Eyni zamanda valideyn iştirakının təlim-tərbiyə prosesində rolu da vurğulanıb.

Konfransın gedişində diqqət çəkən maraqlı bir məqam da olub. Adətən rəhbər şəxslərin tədbirlərdə oturaraq nitq söylədiyinə, iştirakçıların isə ayağa qalxaraq fikirlərini bildirdiyinə öyrəşmiş cəmiyyət üçün İlhamə Abdullayevanın davranışı fərqli mesaj verib.

Belə ki, İlhamə Abdullayeva bütün çıxışı boyunca oturmayaraq, ayaq üstə nitq söyləyib və suallara da eyni şəkildə cavab verib. Onun bu davranışı tədbir iştirakçıları tərəfindən hörmət, bərabərlik və həmrəylik nümunəsi kimi qiymətləndirilib. Bu jest, rəhbər–müəllim münasibətlərində yeni yanaşmanın, qarşılıqlı etimadın və əməkdaşlığın simvolu kimi qəbul olunub.

İlhamə Abdullayevanın bu jesti sadəcə bir davranış deyil, həm də təhsildə idarəetmə mədəniyyətində dəyişikliklərə işarədir. O, bu hərəkəti ilə müəllimlərə "sizlərlə eyni sıradayam" mesajını verib və "müəllimə bərabər yanaşma" prinsipinə əməli olaraq nümunə göstərib.

Görüş fikir mübadiləsi ilə davam edib və iştirakçılar belə tədbirlərin davamlı olmasının təhsilin inkişafına ciddi töhfə verəcəyini vurğulayıblar.