Siyəzən Rayon sakini İmamcan Əliyev Facebook sosial şəbəkəsində özünə məxsus hesabında Azərbaycan Respublikasının Elm və Təhsil Nazirliyinə və Baş Prokurorluğa açıq məktubla müraciət edib.

Vətəndaş müraciətində Quba–Xaçmaz Regional Təhsil İdarəsinin tabeliyində olan təhsil şöbələrində baş verdiyini iddia etdiyi qanunsuzluqlar, özbaşınalıq, dövlət əmlakının mənimsənilməsi, sənədlərin saxtalaşdırılması və vəzifə səlahiyyətlərinin aşılması hallarını diqqətə çatdırıb.

Bakunews.az olaraq İmamcan Əliyevin açıq məktubunu olduğu kimi təqdim edirik:

Quba-Xaçmaz Regional Təhsil İdarəsinin tabeçiliyində olan Təhsil şöbələrində baş verən qanunsuz hərəkətlər, özbaşınalıq, dövlət əmlakının mənimsənilməsi, sənədlərin saxtalaşdırılması, vəzifə səlahiyyətlərinin aşılması ilə bağlı
VƏTƏNDAŞ ŞİKAYƏTİ

CƏNABLAR, mən artıq şikayət etməkdən bezmişəm. Heç bir şikayətə baxılmır. Hamı daxil olan şikayətləri guya aidiyyəti üzrə göndərir və nəticəsi barədə vətəndaşa məlumat verilməsini xahiş edir. Heç bir şikayət araşdırılmır və vətəndaşlara şablon cavablar verilir.

Bu çox təhlükəli tendensiyadır. Xalq və Hakimiyyət arasında uçuruma aparır. Təsadüfi, idarəetmə qabiliyyəti olmayan, səriştəsiz adamların yüksək vəzifələrə təyinatı son nəticədə məmur özbaşınalığına və korrupsiyaya yol açır.

Siyəzən rayon təhsil şöbəsində baş verənlər təhsil sistemimizin necə acınacaqlı vəziyyətdə olduğunun bariz nümunəsidir. Bir müddət bundan öncə Siyəzən şəhəri 6 saylı məktəbdən ümumi dəyəri 5–6 min manata yaxın olan 6 ədəd kompüter çıxarılaraq Bakı şəhərindəki lombardların birinə girov qoyularaq pul götürülüb.

Bununla bağlı bir laborantı öz ərizəsi ilə işdən azad ediblər. Vəs-salam, şüt-tamam. Cənablar, necə bilirsiniz, məktəb rəhbərinin və sektor müdirinin xəbəri olmadan məktəbin əsas vəsaitini “yerbəyer” etmək olar? Məktəbin direktor əvəzi Nərmin Cəfərova və sektor müdiri Elşad müəllim bu gün də heç nə olmamış kimi vəzifədə qalıblar.

Məktəblərdə sinif jurnallarında dəyişiklik olunur, qaiblər və qiymətlər ağardılaraq düzəldilir. Məktəbin bufetindən aylıq haqq alınır. Məktəb ərazisinə yaxın sahibkardan aylıq tələb olunur, vermədikdə mağazanın məktəbin həyətinə açılan qapısı direktor əvəzi Nərmin Cəfərova və sektor müdiri Elşad müəllim tərəfindən bağlanılır.

Şəkillər əlavə edirəm ki, hər şey açıq-aydın görünsün.

Cənablar, əgər bacarırsınızsa, tədbir görün. Bacarmırsınızsa, heç olmasa “təsəlli qolu” kimi bir standart cavab verin ki, bilək — bu ölkədə şikayətlər gedib ünvanına çatır.