Yardımlı rayonunun Arvana kənd tam orta məktəbi artıq neçənci dəfədir ki, ölkə mətbuatının və ictimaiyyətin mənfi mənada diqqət mərkəzindədir. Lakin görünən odur ki, nə Lənkəran-Astara Regional Təhsil İdarəsi, nə də digər aidiyyatı qurumlar buradakı
özbaşınalıqları görmək istəmir.

Tehsilmedia.az qeyd edir ki, məktəbdə Musiqi, Təsviri incəsənət, İngilis dili, Kimya və Biologiya kimi vacib fənlər üzrə vakansiyaların gizlədilməsi təsadüfi deyil. İddia olunur ki, bu dərsləri direktor özü "tədris edir". Məqsəd dərs saatlarını və buna uyğun maaşı kənar şəxslərə verməmək, pulları bir əldə toplamaqdır. Cəmi 8 otağı olan bir məktəbdə 5 xidmətçinin ştatda olması hansı məntiqə sığır? Bu, büdcə vəsaitlərinin açıq-aşkar talanması deyilmi?

Məktəbdəki idarəetmə sistemi tamamilə qohumluq əlaqələri üzərində qurulub. Psixoloqun direktorun qardaşı olması, texniki heyətin və müəllimlərin əksəriyyətinin yaxın qohumlardan ibarət olması məktəbi dövlət müəssisəsindən çox, bir ailə şirkətinə bənzədir. Ən dəhşətli məqam isə "ölü canlar" sistemidir: bəzi müəllimlərin adına yazılan əlavə dərslərin pulunun maaş günü direktor tərəfindən nağd şəkildə geri alınması iddiaları hüquq-mühafizə orqanları tərəfindən dərhal araşdırılmalıdır.

Məktəbin direktoru haqqında gələn şikayətlərin ən maraqlı tərəfi onun şəxsi təsərrüfatı ilə bağlıdır. Deyilənə görə, direktor məktəbi də elə öz ferması kimi idarə edir. Davamiyyətin sıfıra enməsi, təhsilin keyfiyyətinin yoxa çıxması onu maraqlandırmır. Onun üçün əsas məsələ 20 ildir oturduğu kreslonu qorumaqdır.

Necə olur ki, hər il edilən şikayətlər "ört-basdır" edilir? Yardımlı sektorunun və Regional İdarənin bu qanunsuzluqlara göz yummasının qiyməti nədir?

Dövlətin təhsil üçün ayırdığı vəsaitlərin bir qrup şəxsin cibinə axması təkcə korrupsiya deyil, həm də kənd uşaqlarının gələcəyinə xəyanətdir. 20 ildir sarsılmaz görünən bu "səltənət" artıq hüquqi müstəvidə cavab verməlidir. Arvana kənd məktəbi direktorun ferması deyil, Azərbaycan Respublikasının qanunları ilə idarə olunan təhsil müəssisəsi olmalıdır!

Tehsil.media