Baş Dövlət Yol Polisi İdarəsi piyadalara rəsmi müraciət edərək, yol hərəkəti qaydalarına ciddi şəkildə əməl etməyə çağırır. Müraciətdə qeyd olunub ki, piyadaların qəflətən yola çıxması, nəzərdə tutulmayan yerlərdən keçməsi və ya piyada keçidlərində ləngiməsi həm onların özləri, həm də sürücülər üçün ciddi təhlükə yaradır.

Qurum bildirir ki, bu cür qayda pozuntuları tez-tez ağır nəticəli yol-nəqliyyat hadisələrinə səbəb olur. Xüsusilə də, nizamlanmayan keçidlərdə və ya görmə sahəsini məhdudlaşdıran yerlərdə diqqətsiz davranış faciə ilə nəticələnə bilər.

Yol hərəkəti qaydalarına əsasən:

- Piyadalar yalnız müəyyən olunmuş keçidlərdən istifadə etməlidirlər;
- Dayanmış avtomobillərin və ya başqa maneələrin arxasından yola çıxmazdan əvvəl yaxınlaşan avtomobillərin olub-olmadığını yoxlamalıdırlar;
- Ləngiməməli, telefonla danışmamalı, qulaqlıqla musiqi dinləməməli və ətraf mühitə maksimum diqqətli olmalıdırlar.

İdarə bütün piyadaları öz həyat və sağlamlıqlarını təhlükəyə atmamağa, yol hərəkəti qaydalarına qeyd-şərtsiz əməl etməyə çağırır.

Unutmayın: Təhlükəsizlik – hər birimizin məsuliyyətidir!