Rayon rəhbərliyi sakinləri suya həsrət qoyublar...

Goranboy rayonu, Qızılhacılı qəsəbə sakini Əhmədov Ramin İsa oğlu tərəfindən “Hürriyyət”in redaksiyasına şikayət məktubu daxil olub. Qəzetimiz vasitəsilə Prezident İlham Əliyevə müraciət edən şikayətçinin məktubunu olduğu kimi dərc edirik:

“Cənab Prezident!

Mən, Əhmədov Ramin İsa oğlu, yazaraq bildirirəm ki, Sovet quruluşu dağılandan sonra yaşadığımız Qızılhacılı qəsəbəsində susuzluqdan əziyyət çəkirik. Əkin sahələrimiz susuzluqdan quruyur. Təbii suvarma su mənbəyi - Tərtər çayından gələn su imkanlı şəxslərin istifadəsi üçün ayrıldığından, biz sakinlər illərdir zülm çəkirik.

Bildirim ki, Tərtər çayının suyu imkanlı şəxslərin örüş və əkin sahələrinin suvarılması üçün ayrılmışdır. Kasıb təbəqə isə mexaniki, yeni artezian quyularından istifadə edir və öz əkin sahəsini Kür çayından ayrılmış Qarabağ kanalından çəkilən su borusu vasitəsi ilə suvarırdı. Hansı ki, bu qaydada suvarma həddindən artıq ernerji sərfiyyatına səbəb olur. Bu sərfiyyatın az da olsa qarşısını almaq üçün rayonun Suvarma Sistemləri İdarəsi mexaniki su qurğularını qeyri-müəyyən vaxtadək dayandırdı. Hazırda kənd sakinləri içməli su təlabatını ödəmək üçün mərkəzə gedib, su gətirirlər.

İcra Hakimiyyəti, Bələdiyyə və digər rəsmi qurumların məsələdən xəbəri var. Su gətirməyə gedən insanlar qəsəbənin mərkəzində yerləşən mağazanın və işıqforun altında toplaşıb, maşın gözləyirlər.

Bələdiyyənin işçiləri şikayət etməyimizə imkan vermir. Sanki insanlar uçaraq su daşımalıdırlar. İnsanlar öz narazılığını bildirir, amma əhəmiyyət vermirlər.

Sonuncu dəfə onlar insanları işıqforun, mağazanın yanından dağıtmağa çalışanda mübahisə düşdü. Orada olan kameralarda bütün görüntülər əks olunub. Ərazi nümayəndəsi və Bələdiyyə sədri yalançı şahidləri yığaraq qardaşım Əhmədov Rasim İsa oğlunu şərləyib, 5 gün müddətinə həbs cəzası verdirdilər. Günahı isə evinə mərkəzdən su gətirmək istəyi olub.

Daha sonra İcra nümayəndəsi məni hədələyərək, “harasa şikayət versən, sənin də, qardaşının da başına oyun açdıracam. Əgər qardaşının sağ-salamat evinizə gəlməyini istəyirsinizsə, sakitcə oturun, yoxsa, sizin üçün heç yaxşı olmaz”, - dedi.

Bələdiyyədə işləyən Elnur və köməkçisi Kamil Qasımov biz sakinlərin qarşısını kəsib, gedib İcra hakimiyyətinə və digər qurumlara şikayət etməyə qoymur. Şikayət etmək istəyən hər kəsi şərləyib həbs etdirirlər. Polis isə məsələnin mahiyyətini araşdırmır. Bu iki şəxsin dəqiq hansı vəzifəni icra etdiklərini bilmirik, amma Bələdiyyənin işçiləri olduğu bəllidir”.

Məsələ ilə bağlı yazıda adı çəkilən Bələdiyyə işçisi Kamil Qasımovla əlaqə saxlamağa çalışsaq da, telefon zənglərimizi cavabsız qoydu.

Jalə FAMİLQIZI

P.S. Atalar yaxşı deyib, “qulaq gündə bir söz eşitməsə, kar olar”. Dağların qoynundan, çaylardan gələn suların varlı təbəqəyə ayrıldığı bir daha öz təsdiqini tapır. Ən gözəl, səfalı yerləri zəbt edən “yuxarı təbəqə” indi də suyumuzu zəbt etməyə başlayıb.(Hürriyyət)

P.P.S. Yazıda adları çəkilən şəxslərin və qurumların mövqeyini dərc etməyə hazırıq.