BNTV.az-a daxil olan məlumatlarda SOCAR-ın Qaz İxrac İdarəsində rəhbər vəzifədə çalışan Sərxan Babaşovla bağlı ciddi iddialar səsləndirilir.

İddialara görə, Sərxan Babaşov barəsində mətbuatda məlumatlar işıqlandırıldıqdan sonra tələbə yoldaşları və yaxın çevrəsi vasitəsilə özünü müdafiə etdirməyə çalışır. Bildirilir ki, o, illərdir mətbuatdan uzaq olan Əkbər Hacıyevin bu məsələlərdən xəbər tutmaması üçün müxtəlif vasitələrə əl atır.

Məlumata əsasən, Sərxan Babaşov vaxtilə Neft Daşlarında çalışarkən Daşqın İsgəndərov tərəfindən işdən uzaqlaşdırılıb. Daha sonra onun Hacıqabul Magistral sahəsinə rəis təyin olunduğu, qısa müddət ərzində isə Qaz İxrac İdarəsində əvvəlcə SƏTƏM üzrə 4-cü müavin, Nazim Səmədzadə təqaüdə çıxdıqdan sonra isə birinci müavin vəzifəsinə gətirildiyi iddia edilir.

BNTV.az-a daxil olan məlumatlarda həmçinin bildirilir ki, Babaşov yaxın qohumlarını müxtəlif sahələrdə işə yerləşdirib. İddialara görə, onun qardaşlarının bir neçəsi dənizdə müxtəlif işlərdə çalışır, qardaşlarından biri isə sürücüsü kimi fəaliyyət göstərir. Qardaşı oğlu Əfqanın da Abşeron MQKS-in texniki şöbəsinə yerləşdirildiyi və gələcəkdə daha yüksək vəzifəyə gətirilməsinin planlaşdırıldığı bildirilir.

Ən ciddi iddialardan biri isə Ağdaş Magistral ərazisində qeyri-rəsmi podratçılıq fəaliyyəti ilə bağlıdır. Mənbələr bildirir ki, bəzi təmir-quraşdırma işləri rəsmi olaraq başqa podratçıların adına rəsmiləşdirilsə də, həmin işlərin idarənin işçiləri vasitəsilə görüldüyü və bu prosesdən qeyri-rəsmi gəlir əldə olunduğu iddia edilir.

Bundan başqa, Qaz İxrac İdarəsinə məxsus iri diametrli qaz çəkilişi layihələrində də oxşar sxemlərin tətbiq edildiyi, qaynaq və montaj işlərinin idarə işçilərinə gördürüldüyü barədə məlumatlar var. Hətta işğaldan azad edilmiş Qarabağ ərazilərində həyata keçirilən layihələrdə də Sərxan Babaşovun adının qeyri-rəsmi qazanc mənbələri ilə hallandığı bildirilir.

İddialara görə, struktur dəyişikliyi ehtimalını nəzərə alan Babaşov yaxın aylarda vəzifədən kənarda qala biləcəyini düşündüyündən qısa zamanda daha çox qazanc əldə etməyə çalışır. Məlumatlarda qeyd olunur ki, podratçıların aldığı mallarda nöqsan aşkar edən və bunu bildirən işçilər isə cəzalandırılır.

Redaksiyaya daxil olan digər məlumatlarda Sərxan Babaşovun kollektiv daxilində insanları bir-birinə qarşı qoyduğu, telefon danışıqlarını yazaraq müxtəlif şəxslərə ötürdüyü də iddia olunur.

Hazırda Qaz İxrac İdarəsində qara metal dövriyyəsi ilə bağlı qeyri-rəsmi “kassa”nın da onun nəzarətində olduğu iddia edilir. Mənbələr bildirir ki, Nazim Səmədzadənin dövründə əsas diqqət istehsalat sahəsinə yönəldilsə də, sonrakı dövrdə rəhbərlik bütün sahələrə müdaxilə etməyə başlayıb.

Qeyd edək ki, bütün sadalananlar redaksiyaya daxil olan iddialar əsasında hazırlanıb. Qarşı tərəfin - Sərxan Babaşovun, SOCAR rəhbərliyinin və Qaz İxrac İdarəsinin mövqeyini dərc etməyə hazırıq.

BNTV.AZ