E.İbadov: “Məmmədəmin Rəsulzadənin nəvəsi olan bu şəxs saxta sənədlərlə həm əmlakı, həm də ailəmin nüfuzunu hədəfə alıb”


28.09.2025-ci il tarixində Bakunews.az-a müraciət edən Elcan İbadov bildirib ki, 1972-ci ildən ailəsinin sahibkarlığında və istifadəsində olan zirzəmə haqqında yayılan məlumatlar yalan və böhtan xarakteri daşıyır. Onun sözlərinə görə, məqsəd mərhum atasına məxsus əmlakı saxta sənədlərlə ələ keçirməkdir.

İbadov deyir ki, Rəsulzadə soyadlı şəxs zirzəmənin guya siyasi repressiyalar idarəsinə aid olduğunu və hətta bir müddət assosiasiya fəaliyyətini də orada apardığını iddia edir. Halbuki, ətraf sakinlər və qocaman əhali redaksiyamızla söhbətlərində Elcan İbadovun dediklərini təsdiqləyiblər.

Məsələni daha da diqqətəlayiq edən məqam isə odur ki, bu şəxsin Azərbaycanın görkəmli dövlət xadimi Məmmədəmin Rəsulzadənin nəvəsi olduğu məlum olub. Elcan İbadov hesab edir ki, onun bu addımı həm atasının sahibkarlığında və istifadəsində olan əmlakına qəsd, həm də xalqın gözündə ucalmış bir şəxsin adına və nüfuzuna xələl gətirən əməl kimi dəyərləndirilməlidir.

“Elə bilirlər ki, 1992-ci ilə aid saxta sənəd gətirməklə atamın əmlakını əlimizdən ala biləcəklər. Amma 1972-ci ildən bu günə qədər bu zirzəmə bizim ailənin sahibkarlığında və istifadəsində olub. Bu şəxsin həmin sənədləri haradan və necə əldə etməsi araşdırılmalıdır,” — deyə Elcan İbadov vurğulayıb.

O əlavə edib ki, Rəsulzadənin maraqları təkcə əmlakı mənimsəməklə məhdudlaşmır, həm də ailəsini cəmiyyətdə ləkələməyə yönəlib.
İbadov Azərbaycan Respublikasının Baş Prokuroru Kamran Əliyevə müraciət edərək saxta sənədlərin araşdırılmasını, əmlak mübahisəsinin qanuni çərçivədə həllini və bu işdə günahkarların məsuliyyətə cəlb edilməsini xahiş edib.

Məsələ ilə bağlı qarşı tərəfin – Rəsulzadənin mövqeyini öyrənməyə çalışırıq. Onun cavabı əldə edilən kimi oxucularımıza təqdim olunacaq.