Ağsu Rayon Mərkəzi Xəstəxanasının ərazisində, xüsusilə Təcili Tibbi Yardım şöbəsinin yaxınlığında yayılan kəskin qoxu ilə bağlı redaksiyamıza çoxsaylı vətəndaş müraciətləri daxil olub. Müraciətlərdə bildirilirdi ki, ərazidə yaranan üfunət qoxusu səbəbindən həmin hissədə dayanmaq belə çətinləşib.

Məsələni araşdırmaq üçün hadisə yerində olan əməkdaşımız qoxunun mənbəyini müəyyən etməyə çalışıb. Müşahidələr zamanı xəstəxana binasının zirzəmi hissəsində çoxsaylı tibbi tullantı torbalarının saxlanıldığı, onların arasında qanlı tibbi ləvazimatlara bənzər tullantıların olduğu görüntülənib. Yay mövsümündə yüksək temperaturun hökm sürdüyü bir vaxtda belə tullantıların uzun müddət həmin şəraitdə saxlanılması əraziyə kəskin qoxunun yayılmasına səbəb ola biləcəyi ehtimalını yaradır.

Qeyd edək ki, tibbi tullantıların idarə olunması sanitar-epidemioloji normalara uyğun həyata keçirilməli, onların saxlanılması və daşınması ətraf mühitin və insanların sağlamlığı üçün risk yaratmamalıdır.

Etibarlı mənbələrin redaksiyamıza verdiyi məlumata görə, zirzəmidə toplanan tibbi tullantıların sonradan təkrar emal və ya utilizasiya məqsədilə aidiyyəti müəssisəyə göndərilməsi nəzərdə tutulur. Lakin bu məlumatın nə dərəcədə doğru olduğu və tullantıların mövcud qaydalara uyğun saxlanılıb-saxlanılmadığı yalnız xəstəxana rəhbərliyinin və aidiyyəti qurumların rəsmi açıqlamasından sonra dəqiqləşə bilər.

Qeyd edək ki, Ağsu Rayon Mərkəzi Xəstəxanasının direktoru Pərviz həkim, Təcili Tibbi Yardım şöbəsinin müdiri isə Aynur həkimdir.

Redaksiya olaraq məsələ ilə bağlı xəstəxana rəhbərliyinin mövqeyini öyrənməyə çalışacağıq. Qarşı tərəfin açıqlamasını dərc etməyə hazırıq.

Mövzu diqqətimizdədir.