Azərbaycan Texnologiya Universitetində (ATU) müxtəlif adlar altında əməkdaşlardan pul tələb edilməsi ilə bağlı iddialar yenidən gündəmə gəlib. Universitetlə bağlı sosial şəbəkələrdə və müxtəlif informasiya resurslarında daha əvvəl də oxşar məzmunlu şikayətlər səsləndirilib.

BNTV.az-ın redaksiyasına daxil olan növbəti material isə məsələ ətrafında ciddi suallar yaradır. Redaksiyaya təqdim edilən “WhatsApp” səs yazısının Azərbaycan Texnologiya Universitetinin Xarici dillər kafedrasının rəhbəri Aysel Məmmədliyə məxsus olduğu iddia edilir.

Səs yazısının məzmunundan müəllimlərdən, eləcə də universitetin ayrı-ayrı struktur bölmələrindən müəyyən məbləğdə vəsait istənilməsi barədə fikirlər səsləndiyi anlaşılır. Hazırda redaksiya həmin səs yazısının məzmununu və irəli sürülən iddiaları araşdırır.

Müraciətdə daha ciddi bir iddia da yer alır. Bildirilir ki, universitetdə dekan, kafedra müdiri və ya digər rəhbər vəzifəyə təyin olunmaq istəyən şəxslərin qarşısına təhsil müəssisəsinin daxilində öz vəsaitləri hesabına müəyyən təmir işləri aparmaq kimi qeyri-rəsmi tələblər qoyulur.

Əgər bu iddialar həqiqəti əks etdirirsə, ortaya çox ciddi suallar çıxır: dövlət universitetində təmir işlərinin maliyyələşdirilməsi hansı qaydada aparılır? Təmir üçün nəzərdə tutulan vəsait varsa, əməkdaşların şəxsi vəsaitinə niyə ehtiyac yaranır? Rəhbər vəzifəyə təyinatla hansısa maliyyə öhdəliyi arasında əlaqə yaradılırmı? Müəllim və struktur rəhbərlərindən pul tələb olunursa, həmin vəsaitlər kim tərəfindən, hansı hüquqi əsasla və hansı hesaba toplanır?

Redaksiyaya daxil olan məlumatlarda Azərbaycan Texnologiya Universitetinin rektoru Yaşar Ömərovun adı da hallandırılır. İddia müəllifləri universitet daxilində həyata keçirildiyi bildirilən pul yığımlarının rəhbər vəzifəli şəxslər vasitəsilə təşkil edildiyini irəli sürürlər.

BNTV.az bu iddiaların təsdiqlənmiş fakt olduğunu bəyan etmir. Lakin redaksiyaya təqdim olunan materialların xarakteri onların aidiyyəti dövlət qurumları tərəfindən araşdırılmasını zəruri edən suallar doğurur.

Müraciətdə Xarici dillər kafedrasının rəhbəri Aysel Məmmədlinin də universitet rəhbərliyinə yaxın şəxslərdən biri olduğu və universitet daxilində ciddi təsir imkanlarına malik olduğu iddia edilir. Bununla yanaşı, redaksiyaya təqdim edilən səs yazısının həqiqətən Aysel Məmmədliyə aid olub-olmaması da qarşı tərəfin mövqeyi və mümkün araşdırmanın nəticələri ilə dəqiqləşdirilməlidir.

Eyni zamanda, müraciətlərdə rektor Yaşar Ömərovun elm və təhsil naziri ilə yaxın münasibətlərə malik olması barədə də iddialar səsləndirilir. Redaksiyanın əlində bu şəxsi münasibət barədə müstəqil təsdiqlənmiş məlumat olmadığından, həmin fikir yalnız müraciət müəlliflərinin iddiası kimi təqdim olunur.
[media=https://youtube.com/shorts/EY6mJk6ZA6g]

Əsas məsələ isə başqadır:
- Azərbaycan Texnologiya Universitetində əməkdaşlardan pul yığılırmı?
- Yığılırsa, hansı məqsədlə?
- Bu vəsaitlərin toplanmasına kim göstəriş verir?
- Toplanan pulların uçotu aparılırmı?
- Universitetdə rəhbər vəzifələrə təyinat zamanı namizədlərdən təmir və ya başqa formada maliyyə xərclərinin qarşılanması tələb olunurmu?

Bu suallara ilk növbədə Azərbaycan Texnologiya Universitetinin rəhbərliyi və Elm və Təhsil Nazirliyi aydınlıq gətirməlidir.

Redaksiyamız universitet rəhbərliyinin, rektor Yaşar Ömərovun və Aysel Məmmədlinin mövqeyini dərc etməyə hazırdır. Eyni zamanda məsələnin Elm və Təhsil Nazirliyi tərəfindən araşdırılıb-araşdırılmayacağı da diqqətdə saxlanılacaq.

Azərbaycan Texnologiya Universitetinin rəhbər şəxslərinin fəaliyyəti ilə bağlı redaksiyamıza daxil olduğu bildirilən digər səs yazıları, foto və video materiallar da araşdırıldıqdan sonra ictimaiyyətə təqdim ediləcək.

Mövzu diqqətimizdədir.