Azərbaycan Avtomobil Yolları Dövlət Agentliyi tərəfindən həyata keçirilən Pirşağı–Novxanı–Xırdalan–M4 avtomobil yolunun Novxanı kəndindən keçən hissəsi ilə bağlı müzakirələr yenidən gündəmə gəlib. Daha əvvəl mediada yayılan məlumatlarda bildirildiyi kimi, yolun ilkin layihəsi bir villanın yerləşdiyi əraziyə görə dəyişdirilərək fərqli istiqamətə yönləndirilib.

İddialara görə, bu dəyişiklik nəticəsində yol göl kənarına çəkilib, onlarla yaşayış evi plana düşüb və dövlət büdcəsindən ayrılan milyonlarla manat vəsaitin səmərəsiz xərclənməsi riski yaranıb.

Mövzu ilə bağlı əldə olunan son məlumatlar isə vəziyyətin daha da mürəkkəb olduğunu göstərir. Bildirilir ki, sözügedən villa kəndin yağış sularının təbii axın istiqamətində inşa edilib. Nəticədə son yağıntılar zamanı suyun hərəkəti məhdudlaşıb, kəndin yuxarı hissəsindən gələn sel suları yolları basaraq bir sıra ev və həyətyanı sahələrə ciddi ziyan vurub.

Bundan əlavə, iddialara əsasən, tikinti zamanı yol kənarında mövcud olan yağış suyu kanalları da zəbt edilib. Bu isə yağışlı hava şəraitində magistral yolun bəzi hissələrinin su altında qalmasına səbəb olub.

Kənd sakinləri bildirir ki, həmin ərazi əvvəllər kanalizasiya sularının axıdıldığı istiqamət olub. Villanın tikintisindən sonra bu sistem pozulub və yalnız sonradan çəkilən kanalizasiya xətləri problemin bir hissəsini aradan qaldıra bilib.

Beləliklə, bir villaya görə dəyişdirildiyi iddia olunan yol layihəsi bu gün də ərazidə infrastruktur problemlərinin əsas səbəblərindən biri kimi göstərilir.

Məsələ ilə bağlı gözləntilər ondan ibarətdir ki, aidiyyəti qurumlar iddiaları obyektiv şəkildə araşdıracaq, layihənin hansı səbəblərdən dəyişdirildiyini müəyyən edəcək və zərurət yaranarsa, yolun ilkin layihə üzrə bərpası istiqamətində addımlar atılacaq.