Bakı şəhəri 117 saylı uşaq bağçası ilə bağlı redaksiyamıza daxil olan müraciət və təqdim edilən səs yazıları məktəbəqədər təhsil müəssisələrində idarəçilik, şəffaflıq və işçi hüquqları ilə bağlı ciddi suallar yaradır.
Tehsilmedia.com xəbər verir ki, müəssisədə uzun illər tibb bacısı kimi çalışan Bahar Cəlilovanın səsləndirdiyi iddialar bağçada idarəçilik prinsiplərinin pozulması, mümkün maraq toqquşmaları və işçilərə qarşı təzyiq mexanizmlərinin tətbiq edildiyi barədə narahatlıq doğurur.
İddialara görə, 117 saylı uşaq bağçasına uzun müddət rəhbərlik edən Solmaz Hacıyevanın 2021-ci ildə vəzifədən ayrılmasından sonra müəssisənin rəhbərliyi onun qızı Fatimə Nəcəfovaya həvalə olunub. Bu hal cəmiyyətdə dövlət müəssisələrində rəhbər təyinatlarının hansı prinsiplərlə həyata keçirilməsi ilə bağlı suallar yaradır.
Bahar Cəlilovanın iddialarına əsasən, yeni rəhbər təyin edildikdən sonra müəyyən müddət ərzində bağçanın idarə edilməsində əvvəlki rəhbərin də aktiv rol aldığı bildirilir. Əgər bu məlumatlar təsdiqini taparsa, dövlət müəssisəsində faktiki idarəetmənin hansı formada həyata keçirildiyi ayrıca araşdırılmalıdır.
Daha ciddi məqam isə müəssisədə əmək münasibətləri, ştat məsələləri və dövlət vəsaitlərindən istifadə ilə bağlı səsləndirilən iddialardır. İşçinin bildirdiyi "ölü canlar" məsələsi, yəni faktiki işləməyən şəxslərin ştatda saxlanılması barədə məlumatlar aidiyyəti qurumlar tərəfindən araşdırılmalıdır.
Çünki söhbət dövlət büdcəsindən maliyyələşən, yüzlərlə uşağın təhsil aldığı və təhlükəsizliyinin təmin edilməli olduğu bir müəssisədən gedir.
Məsələ ilə bağlı diqqətçəkən digər məqam isə işçinin müraciətlərinə münasibətdir. İddialara görə, qanunsuzluqlara etiraz edən əməkdaş təzyiq və təqiblərlə üzləşib.
Əməkdaşların hüquqlarının müdafiəsi ilə məşğul olmalı olan həmkarlar təşkilatlarının mövqeyi də suallar doğurur. İddialarda Azərbaycan Təhsil İşçiləri Azad Həmkarlar İttifaqının Yasamal rayon komitəsinin sədri Rövşən İbrahimlinin və bağçanın həmkarlar nümayəndəsi Gülşən Əliyevanın məsələyə münasibəti tənqid olunur.
Əgər işçinin səsləndirdiyi iddialar təsdiqlənərsə, bu, təkcə bir bağçada yaranmış problem deyil, dövlət müəssisələrində şəffaf idarəetmə, kadr siyasəti və əmək hüquqlarının qorunması ilə bağlı daha geniş problemlərin göstəricisi ola bilər.
Hazırda əsas sual budur: 117 saylı uşaq bağçasında səsləndirilən iddialar nə qədər əsaslıdır və aidiyyəti qurumlar bu məsələyə hüquqi qiymət vermək üçün hansı addımları atacaq?
Redaksiya məsələ ilə bağlı Elm və Təhsil Nazirliyinə, Məktəbəqədər və Ümumi Təhsil üzrə Dövlət Agentliyinə və digər aidiyyəti qurumlara rəsmi sorğu göndərməyə hazırdır.