Bakı – Müasir dövrdə şəhərlər artıq yalnız fiziki məkan deyil, texnologiya və idarəetmənin inteqrasiyası ilə formalaşan kompleks sistemlərə çevrilir.

Politoloq Ramilə Sultan bildirir ki, bu transformasiyada süni intellekt (AI) əsas rol oynayır və şəhər idarəçiliyində yeni mərhələnin əsasını qoyur.
Onun sözlərinə görə, Sinqapur, Seul və Amsterdam kimi şəhərlərdə AI əsaslı sistemlər artıq uğurla tətbiq olunur. Bu texnologiyalar nəqliyyatın optimallaşdırılması, enerji resurslarının səmərəli istifadəsi və ictimai xidmətlərin real vaxt rejimində idarə olunmasına imkan yaradır.

“Əsas fərq ondadır ki, qərarlar artıq keçmiş məlumatlara deyil, real vaxt analitikası və proqnozlara əsaslanır. Bu isə şəhərləri daha çevik və öncədən planlaşdırılan sistemlərə çevirir,” – deyə o qeyd edib.
Politoloq vurğulayıb ki, Azərbaycan da “ağıllı şəhər” və “yaşıl enerji” layihələri ilə regionda innovativ model formalaşdırır. Xüsusilə işğaldan azad olunmuş ərazilərdə qurulan yeni şəhərlər bu sahədə mühüm rol oynayır.
Ekspert hesab edir ki, növbəti mərhələdə əsas hədəf lokal layihələrdən vahid milli süni intellekt əsaslı şəhər idarəetmə sisteminə keçiddir. Bu yanaşma idarəetmədə keyfiyyətcə yeni mərhələ yarada bilər.
Süni intellektin tətbiqi vətəndaşların gündəlik həyatına da birbaşa təsir edir.

Nəqliyyatın tənzimlənməsi, xidmətlərin sürətlənməsi və resursların düzgün bölüşdürülməsi həyat keyfiyyətini artırır. Eyni zamanda, qərarların məlumatlara əsaslanması şəffaflığı və ictimai etimadı gücləndirir.
Ramilə Sultan əlavə edib ki, bu transformasiya həm də yeni iqtisadi imkanlar və iş yerləri yaradır, rəqəmsal iqtisadiyyatın inkişafını sürətləndirir.
Onun fikrincə, Azərbaycan innovativ yanaşmalarla qlobal urban inkişaf modelini formalaşdıran və ixrac edən ölkələrdən birinə çevrilə bilər.