Ermənistan bir neçə gündür cidd-cəhdlə Qafandakı hava limanının fəaliyyət göstərdiyini və ora müntəzəm uçuşların həyata keçirildiyini təşkil etməyə çalışır.
Bakunews.az axar.az-a istinadən xəbər verir ki, bir neçə gün öncə Ermənistan hökumət nümayəndələrə Qafana səfərlərini birmühərrikli kiçik təyyarələrlə gerçəkləşdirdiklərini elan etdilər. Bunun ardınca isə guya həmin təyyarə istiqamətində “güllə atıldığı” iddiası səsləndi.
Bu gün isə İrəvan-Qafan reysi ilə ilk müntəzəm xətt uçuşlarının baş tutduğu bildirildi.
Qafan aeroportu – yalnız kiçik təyyarələri qəbul etmək imkanındadır. Bugünkü “müntəzəm reysdən” də Qafan meriyasının vəzifəliləri istifadə edib.
İrəvandan Qafana avtomobil yolu 300 km, hava yolu isə 195 km-dır: avtomobillə 3,5 saat, təyyarə ilə məsafəni 45 dəqiqəyə qət etmək olur.
Ermənistan İrəvan-Qafan reysinin qiymətini də açıqlayıb: 20 min dram (təxminən 52 dollar/88 manat).
Bakı-Naxçıvan reysinin məsafəsi, qiyməti və quru nəqliyyatının çətinliklərini nəzərə aldıqda, İrəvan-Qafan reysi kifayət qədər bahadır. Eyni zamanda, aeroporta getmək və o prosedurları keçməyə vaxt və enerji itirmək əvəzinə insanların daha ucuz və vaxta qənaət baxımından quru nəqliyyatını seçəcəyi, başqa sözlə desək, İrəvan-Qafan reysinin heç də müntəzəm olmayacağı gözləniləndir.
Əslində, Ermənistan uzun illərdir Qafan aeroportunu işlək etmək üçün çalışır. Hətta buna görə uçuş-enmə zolağı da qismən təmir edildi, yüngül təyyarələrin uçuşu üçün yerli şirkətlə müqavilə bağlandı.
Maraqlıdır, İrəvan niyə Qafanda aeroportun işlək olmasına çalışır?
Beynəlxalq normalara görə, hava limanları ölkə sərhədlərindən ən azı 12 km daxildə yerləşməlidir. Dünyada sərhəddə yerləşən aeroportlar da var, lakin bu aeroportlar müştərək – hər iki sərhəd ölkəsi tərəfindən istifadə olunur.
Qafan aeroportu Azərbaycanla sərhədin bir neçə yüz metrliyində yerləşir, hətta təyyarə havaya qalxarkən hər dəfə Azərbaycan hava məkanına girməyə məcbur olur.
Beləliklə, heç bir iqtisadi səmərəsi olmayan, sosial mahiyyət daşımayan, həm də yalnız yüngül təyyarələri qəbul etmək gücündə olan aeroportun mütləq və mütləq işlədilməsində İrəvanın məqsədi nədir?
1-ci ehtimal: Qafanda İranın Baş Konsulluğu fəaliyyət göstərir, Rusiya da bu ərazidə konsulluq açmaq niyyətindədir. İrəvan “perspektivdə” Qafanın və ümumilikdə Qərbi Zəngəzurun iqtisadi imkanlarının artmasına çalışır.
Ancaq bu ehtimal üçün yüngül təyyarələr yox, iri yük və sərnişin təyyarələrini qəbul etmək gücündə aeroport vacibdir. Qafan aeroportunun o həcmdə genişləndirilməsi isə mümkünsüzdür;
2-ci ehtimal: Qafan aeroportunu “mülki uçuşlar” üçün aktivləşdirmək və müntəzəm reyslərlə “adiləşdirməklə” Azərbaycan sərhədində hərbi təyinatlı gələcək uçuşlara zəmin hazırlanır. Bu, əlbəttə, kəşfiyyat uçuşları ola bilər;
3-cü ehtimal: Qafan aeroportunun aktivləşdirilməsi sırf hərbi məqsədlər üçündür. Bu, həm də Rusiyanın arzusu ilə ola bilər. 102-ci hərbi bazanın hərbçiləri üçün Qərbi Zəngəzurda dislokasiya yerləri inşa olunub, Ermənistan ordusu da bu aeroportdan çevik təchizatlar üçün istifadə edə bilər.
Bakunews.az