Böyük Britaniyanın Müdafiə və Əmək nazirlikləri arasında tərəfdaşlıq barədə müqavilə imzalanıb. Bu razılaşma çərçivəsində Müdafiə Nazirliyinin kadr məsələləri ilə məşğul olan əməkdaşları ölkənin məşğulluq mərkəzləri ilə birbaşa əlaqəli şəkildə fəaliyyət göstərəcəklər.

Bu mexanizm vasitəsilə Böyük Britaniyada işsiz gənclər silahlı qüvvələrdə ödənişli xidmətə qoşulmağa təşviq ediləcəklər. Rəsmi dairələr hesab edirlər ki, bu addım 10 minlərlə gənci mühəndislik və kibertəhlükəsizlikdən tutmuş, səhiyyə və logistikaya qədər hərbçilərə lazım olan ən müxtəlif sahələrdə işlərə cəlb etməyə imkan verəcək.

Müdafiə Nazirliyinin kadr məsələlərinə məsul əməkdaşları sosial müavinət alan gənc işsizlər arasında hərbi karyeranı aktiv şəkildə təbliğ edəcəklər. Böyük Britaniyanın veteranların işləri üzrə naziri Luiza Sandher-Cons vurğulayıb ki, təşəbbüs heç vaxt müdafiə sahəsi barədə düşünməyən şəxslərə yeni bacarıqlar, hədəflər və imkanlar qazandırmaq məqsədi daşıyır.

Hökumət ödənişli "Gap Year" (təhsil və ya karyera prosesində birillik fasilə) adlanan proqramı sınaqdan keçirməyi planlaşdırır. Bu layihə 25 yaşdan kiçik olan gənclərə hərbi xidmətlə yaxından tanış olmaq imkanı verəcək. Eyni zamanda xidmət yaşı həddi 65 yaşa qədər yüksəldiləcək. İki nazirlik tərəfindən sınaqdan keçirilən bu tədbir həmçinin kütləvi ixtisarlar nəticəsində iş yerini itirmiş təcrübəli şəxslərin də müdafiə sənayesində işlə təmin olunmasına şərait yaradacaq.