Son zamanlar vətəndaşların hərbi xidmətə yararlılıq dərəcəsinin qiymətləndirilməsi ilə bağlı narazılıqlar artır. Bu dəfə Ağdaş rayonunda qeydə alınan hal valideynlərin ciddi narahatlığına səbəb olub. Belə ki, vətəndaş Səmədov Kərəm Nəsib oğlunun sağlamlıq vəziyyəti ilə bağlı hər hansı ətraflı tibbi yoxlama aparılmadan onun hərbi xidmətə yararlı hesab edildiyi iddia olunur.

Valideynlərin bildirdiyinə görə, Kərəm Səmədovun bir ayağı digərindən qısadır və oma sümüyündə yeyilmə, sürtülmə problemi mövcuddur. Müxtəlif dövlət və özəl xəstəxanalarda aparılan müayinələr onun ciddi sağlamlıq problemləri olduğunu təsdiqləsə də, Azərbaycan Respublikası Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Tibbi-Sosial Ekspertiza və Reabilitasiya Agentliyi (bundan sonra – Agentlik) tərəfindən heç bir ətraflı tibbi yoxlama aparılmadan onun hərbi xidmətə yararlı olması barədə rəy verildiyi bildirilir.

Valideynlər və yerli sakinlər bu halı qərəzli qərar kimi qiymətləndirir və vətəndaşların sağlamlıq vəziyyətinə obyektiv yanaşılmasını tələb edirlər. Onlar hesab edirlər ki, tibbi qiymətləndirmə şəffaf və vicdanlı şəkildə aparılmalı, vətəndaşların hüquqları qorunmalıdır. Əhali ümid edir ki, aidiyyəti dövlət qurumları məsələyə müdaxilə edəcək, tibbi komissiyaların fəaliyyəti obyektiv şəkildə yoxlanılacaq və gələcəkdə bənzər halların baş verməsinin qarşısı alınacaq.