Ədliyyə Nazirliyinin Penitensiar Xiidməti istilik sistemlərinin çəkilişi işləri üzrə 06.03.2025-ci ildə başladığı açıq tenderə yekun vurub. Müsabiqənin qalibi “EUROSERVİSE” Məhdud Məsuliyyətli Cəmiyyəti seçilib və tərəflər arasında 611.864,21 manat məbləğində satınalma müqaviləsinin bağlanılması nəzərdə tutulur. Məlumat satınalmaların portalında 30.05.2025-ci ildə dərc edilib.

Qeyd edək ki, Penitensiar Xidməti 22.01.2025-ci ildə də “EUROSERVİSE” MMC ilə istilik sistemlərin çəkilməsi üzrə 760.796,26 manat dəyərində satınalma müqaviləsi bağlamışdır. Bu tenderin şərtlərinə görə MMC Bakı İstintaq Təcridxanası, 6 saylı Cəzaçəkmə Müəssisəsini, 15 saylı Cəzaçəkmə Müəssisəsini və digər tabeli qurumlarda polipropilen borulardan daxili su təchizatı və istilik sistemlərinin boru kəmərlərinin çəkilməsi, su qızdırıcılarının quraşdırılması işlərini həyata keçirib.

Qeyd edək ki, Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “EUROSERVİSE” (VÖEN: 1503047971) Məhdud Məsuliyyətli Cəmiyyətinin 26.11.2015-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının BAKI ŞƏHƏRİ NƏRİMANOV RAYONU, AŞIQ MOLLA CÜMƏ, ev.1, m.11, qanuni təmsilçisi kimi isə Nəcəfov Elşən Məcid oğlu qeyd olunub. MMC-yə vergi hesabatını və ya onu əvəz edən arayışı vaxtında təqdim etməməyə görə dəfələrlə maliyyə sanksiyası tətbiq edilmişdir.

MMC-nin portalına yerləşdirilmiş məlumata görə şirkətin ilk əsas fəaliyyəti qaz xətlərinin layihələndirilməsini, qaz xətlərinin çəkilişini və qaz sayğaclarının quraşdırılmasını yüksək keyfiyyətlə və sərfəli qiymətlərlə həyata keçirmək olmuşdur. Son 3 ildə kifayət qədər maddi-texniki bazaya malik olan şirkətimiz tikinti sahəsində də öz bacarıqlarını sınayaraq tenderlərdə iştirak etmiş və bir çox tenderlərin qalibi olmuşdur.

Göründüyü kimi Ədliyyə Nazirliyinin Penitensiar Xiidməti bu şirkətlə uzun müddətdir işbirliyində olub. Apardığımız araşdırmalar zamanı məlum oldu ki, Penitensiar Xidməti “EUROSERVİSE” MMC ilə bağladığı satınalma müqavilələri bunlarla bitmir. Belə ki, 28.07.2020-ci ildən 30.05.2025-ci ilə qədər Penitensiar Xidmət və ona tabeli qurumlar sözügedən şirkətlə ümumi olaraq 4 358 851 manat məbləğində 35 satınalma müqaviləsi bağlayıblar.

Qeyd edək ki, “EUROSERVİSE” MMC Penitensiar Xidmətiə tabeli qurumlara istilik sistemlərinin çəkilişi işləri ilə barəbər cari və əsaslı təmir işlərini həyata keçirib. Məsələn MMC 15.11.2022-ci ildə Salyan rayonu 5 saylı Cəzaçəkmə Müəssisəsi ilə cari və əsaslı təmir işləri üzrə ümumi dəyəri 78 308 manat olan iki satınalma müqaviləsi bağlayıb.

Penitensiar Xidmətin 12 saylı Cəzaçəkmə Müəsisəsi isə əsaslı təmir işlərinin satınalınması üzrə “EUROSERVİSE” Məhdud Məsuliyyətli Cəmiyyəti ilə 37.846,22 manat məbləğində, cari təmir işlərinin satınalınması üzrə isə sözügedən şirkətlə 38.039,7 manat məbləğində satınalma müqavilələri bağlayıb. Bu məlumatlar satınalmaların portalında 02.06.2022-ci ildə dərc edilib.

Xatırlatmaq istərdik ki, bu Penitensiar Xidmətin həmin 12 saylı Cəzaçəkmə Müəsisəsidir ki, iyunun 1-də saat 13:10-da məhkumlar üçün nəzərdə tutulmuş yaşayış binasının dam örtüyü uçmuşdu. Medianın yaydığı məlumatda bildirilirdi ki, nəticədə bir nəfər məhkum xəsarət almışdır. Sonra isə Bakıda 12 saylı cəzaçəkmə müəssisəsində binanın dam örtüyünün uçması nəticəsində xəsarət alan məhkumun ölməsi barədə məlumat yayıldı. APA-nın sorğusuna cavab olaraq Ədliyyə Nazirliyindən bildirilib ki, iyunun 1-də saat 13:10-da 12 saylı cəzaçəkmə müəssisəsinin məhkumlar üçün nəzərdə tutulmuş yaşayış binasının dam örtüyü uçub. Nəticədə bir nəfər məhkum, Azərbaycan Respublikası Cinayət Məcəlləsinin 120.1-ci maddəsi ilə (qəsdən adam öldürmə cinayətinə görə) azadlıqdan məhrum edilmiş Mustafayev Mövlam Muxtar oğlunun iyunun 2-də aldığı xəsarətlərdən həyatını itirdiyi müəyyən edilib.

Satınalmaların portalında “EUROSERVİSE” MMC-nin Penitensiar Xidmətin 12 saylı Cəzaçəkmə Müəssisəsində nə kimi təmir işlərinin aparması barədə ətraflı məlumat yoxdu. Şübhələr də elə buradan yaranır. Bəlkə elə MMC 12 saylı Cəzaçəkmə Müəssisəsində uçan dam örtüyünü keyfiyyətlə təmir etməyib? Bu təbii ki, aidiyyatı qurumlar tərəfindən araşdırıldıqdan sonra bəlli olacaq.

Aktualinfo.org