Böyük bir dövlət təşkilatına rəhbərlik edib də, dövlət siyasətinin əleyhinə getmək və özəl maraqlar xatirinə bir toplumun can sağlığını gözardı etməyin adı başqadır!

Ötən ilin noyabrın 12-də Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası keçirildi. Xatırladaq ki, bu tədbir - BMT-nin İqlim Dəyişmələri Konfransı – BMT-nin İqlim Dəyişmələri üzrə Çərçivə Konvensiyası (UNFCCC) çərçivəsində hər il keçirilən konfransdır. Bu görüşlər iqlim dəyişikliyi ilə mübarizədə əldə edilmiş tərəqqini qiymətləndirmək və 1990-cı illərin ortalarından etibarən inkişaf etmiş ölkələr üçün istixana qazı emissiyalarını azaltmaq üçün hüquqi cəhətdən məcburi öhdəliklər qoyan Kioto Protokolunu müzakirə etmək üçün UNFCCC tərəflərinin – Tərəflər Konfransının (COP) rəsmi görüşü kimi xidmət edir.

Azərbaycan Respublikasının Prezidenti cənab İlham Əliyevin açılışını etdiyi, BMT-nin Baş katibi Antonio Quterraş başda olmaqla bir sıra dövlət və hökumət başçılarının iştirak etdiyi Sammit yüksək səviyyədə keçirildi və bir sıra vacib nəticlərələ yadda qaldı. Azərbaycan yaşıl enerji sahəsində yenilikləri ilə Beynəlxalq Ekosistemə töhvələr verməkdə davam edir. Bu dövlət başçımız üçün prioritet məsələlərdən birinə çevrilib...

Təəssüf ki, bu həqiqəti ya bilməyən, ya da bilmək istəməyən yüksək çinli məmurlarımız da var...

AAYDA-nin “şef”i Saleh Məmmədov kimi...

Bak-Sumqayıt yolunun sol tərəfində, Ceyranbatan qəsəbəsindən sonra “Asfalt zavod” deyilən bir yaşayış massivi var. Adı üstündədir-burada sovetdənqalma, həm də iş qabiliyyətini qoruyub saxlaya bilmiş bir Asfalt zavodu var. Bu zavod Azərbaycan Avtomobil Yolları Dövlət Agentliyinin (AAYDA) “Bakı 1 nömrəli Yol İstismarı” MMC-nin balansında fəliyyət göstərir. Bundan başqa, elə eyni ərazidə “Bakı 1 nömrəli Yol İstismarı” MMC-nin adı bəlli olmayan, iritonnajlı avtomobillərin qarajı kimi tanınan daha bir idarəsi var...

“Onillərdir ki, bura yaşayış ərazisidir. Gördüyünüz kimi, asfalt zavod da, bu qaraj da yaşayış massıvının ortasındadır. Zavodun tüstüsü, qarajın iritonnajlı maşınları həyatımızı alt-üst edir. İndi hansı zəmanədir ki, hansısa zavoddan belə tüstü çıxsın. Ölkədə ekoloji problemlərlə bağlı ciddi addımlar atılır. Amma, bu rəhbərlər ya “fil qulağında yatıb”, ya da onlara belə sərf edir. Elə bil qəsdən kimlərsə bizim nəfəsimizi kəsir...Uşaq demirlər, yaşlı demirlər, şikəst ediblər bizi. Bu illər ərzində burada bir nəsil yetişib. Təsəvvür edirsiniz, burada dünyaya göz açıb, 30-40 yaşına çatan insanın sağlığı necə ola bilər?

Mən inanmıram ki, Ermənistanın Metsamor AES-i bu dərəcədə zərərli olsun. Dəfələrlə müxtəlif formada etirazımızı bildirsək də, nəticə olmur. Ümidimiz bircə cənab prezidentə qalıb ki, məlumatı olsun və problemin həllini tapşırsın”.

Bu narazılıq sözügedən ərazidə yaşayanların Yenixeber.org-un əməkdaşı ilə söhbətindəndir. Sakinlərin dəvəti ilə sözügedən ərazidə olduq...Video və fotolardan mənzərə aydındır. Necə deyərlər “Görünən dağa nə bələdçi”. Zavodun 10-15 metrliyində yaşayış təsəvvürolunmaz dərəcədə fəlakətlidir. Vətəndaşın da qeyd etdiyi kimi, bu gün hansı zamandir ki, bir zavoddan ətrafı bu dərəcədə çirkləndirəcək zərərli maddələr çıxsın. Bəs filtr deyilən, müasir texnalogiya deyilən nəsnələr də var axı...

Biz məlum qanun və prinsiplərə uyğun olaraq 30.06.2025-ci il tarixdə aidiyyatı dövlət strukturlarından ikisinə - Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədova və Ekologiya və Təbii Sərvətlər Nazirliyinin 4 saylı Regional Ekologiya və Təbii Sərvətlər İdarəsinə video və fotolarla birlikdə online rəsmi sorğu ünvanladıq.

Ötən ayın 10-da 4 saylı Regional Ekologiya və Təbii Sərvətlər İdarəsinin rəis müavini, rəis səlahiyyətlərini müvəqqəti icra edən Emin Ələkbərovun imzası ilə məktub aldıq. Məktubda qeyd edilir ki, 2024-cü ildə bu zavodda monitorinqlər aparılmış və ciddi nasazlıqlar aşkar edilmişdir. Müəssisənin rəhbəri 4000 manat, MMC isə hüquqi şəxs qismində 10500 manat cərimə edilmişdir. Bu il isə aparılan monitorinqlə atmosferə atılan zərərli maddələrin miqdarının normada olduğu müəyyənləşib(?) Və s.

Göründüyü kimi ekoloji duruma sorumlu olan struktur da problemin mövcudluğunu birbaşa etiraf edir.

Artıq bir ayı keçməsinə baxmayaraq hörmətli Saleh Məmmədovdan isə cavab yoxdur... Səbəbini biz bilmirik: cavab yazmağa söz tapılmır, yoxsa sayqısızlıq?

Onu da xatırladaq ki, bir müddət əvvəl mediada hüquqi təmsilçisi Həmzəyev Zaur Oktay oğlu olan “Bakı 1 nömrəli Yol İstismarı” MMC-nin 580 203.89 manat vergi borcu olması haqqında məlumat yayılmışdır. Vaxtı ilə rəisi Saleh Məmmədov olan bu MMC həm də, AAYDA-nın ən böyük idarəsi sayılır.  

Saleh Məmmədova xatırlatma...

Hörmətli Saleh Məmmədova xatırlatmaqda fayda var ki, ekoloji problem, yaşıl enerji və s. dövlət başçısı cənab İlham Əliyevin prioritet hesab etdiyi və bu istiqamətdə gərəkən addımlar atdığı sahədir. Yazının girişində qeyd etdiyimiz kimi, bu məsələ təkcə ölkədaxili deyil, beynəlxalq tədbirlərdə də, siyasi hakimiyyətin aktiv fəaliyyəti ilə müşahidə edilir. Və Azərbaycan konkret təklif və addımları ilə diqqət mərkəzinə çevrilir.

Haqqında yazdığımız problemin varlığını etiraf etməkdən ötrü isə nə hansısa texnoloji avadanlıqlara, nə də xüsusi biliyə ehtiyac yoxdur. Sadəcə, problemi görmək istəyi və etiraf etmək cəsarəti yetər. Həm də vətəndaş bunu Ermənistanın Metsamor Atom Elektrik Stansiyası ilə müqayisə edirsə... 

Belə olan halda isə rəhbəri Saleh Məmmədov olan dövlət qurumunun hansısa zavodunda ekoloji problemin fontan vurması yumşaq desək anlaşılmazdır. Bəlkə də kimlərsə bunu prezidentin siyasətinin sabotaji kimi də qəbul edə bilər...

Nə olursa olsun, Saleh Məmmədovun bilib və unutmamalı olduğu vacib şərtlər var: Böyük bir dövlət təşkilatına rəhbərlik edib də, dövlət siyasətinin əleyhinə getmək və özəl maraqlar xatirinə bir toplumun can sağlığını gözardı etməyin adı başqadır!

Bunlar çox ciddi faktorlardır. Bu səbəbdən də, unutmaq olmaz ki, heç bir vəzifə sahibi bir gün “qapısının döyülmədən açılacağından” sığortalanmayıb...(Yenixeber.org)

Mövzunun davamı olacaq.