Geodeziya və Kartoqrafiya Agentliyi "A ənd J Holdinq" MMC ilə satınalma müqaviləsi bağlayıb.

Hurriyyet.az-ın məlumatına görə, müqavilədə kondisionerlərə təmir xidmətinin satın alınması nəzərdə tutulur. Təmir işlərinə görə şirkətə 12 512,2 manat ödəniləcək.

İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, "A ənd J Holdinq" MMC 24 noyabr 2005-ci ildə qeydiyyata alınıb. Nizamnamə kapitalı 20 510 540 manatdır. Hüquqi ünvanı Bakı şəhəri Səbail rayonu, Murtuza Muxtarov küçəsi, ev 9, mənzil 30-da yerləşən şirkətin qanuni təmsilçisi Məhərrəmov Fuad Rövşən oğludur.

Mediada gedən məlumatlara görə, "A ənd J Holdinq" MMC deputat Əlibala Məhərrəmzadəyə məxsudur. Əlibala Məhərrəmzadənin 2024-cü ilədək şirkətə rəhbərlik etməsi bu iddianın əsassız olmadığına şübhələri artırır.

Deputat həmçinin "Ukrayna Ticarət Evi" MMC-nin rəhbəri olub. Bu şirkətin də ona məxsus olduğu iddia edilir. Yeri gəlmişkən, Milli Məclisdə 59 saylı Quba seçki dairəsini təmsil edən Əlibala Məhərrəmzadə Azərbaycan-Ukrayna parlamentlərarası əlaqələr üzrə işçi qrupunun rəhbəridir.

Hazırda "Ukrayna Ticarət Evi" MMC-də səyyar vergi yoxlaması keçirilib və şirkətə 1 149 678.42 manat əlavə vergi, 700 217.03 manat isə maliyyə sanksiyası hesablanıb. Hazırda vergi sistemində "Ukrayna Ticarət Evi” MMC-nin 871 967,52 manat vergi borcu olduğunun göstərilir.

Onu da qeyd edək ki, "A ənd J Holdinq” MMC-nin indiki rəhbəri Fuad Məhərrəmov həm də "Ukrayna Ticarət Ev” MMC-nin qanuni təmsilçisidir. Bəzi ehtimallara görə, Fuad Məhərrəmovla Əlibala Məhərrəmzadə arasında qohumluq əlaqələri var.

Başqa bir maraqlı məqam isə "A ənd J Holdinq” MMC-nin fəaliyyət sferası ilə bağlıdır. Şirkət haqqında açıq mənbələrdə hər hansı məlumat olmadığından onun konkret olaraq hansı sahə üzrə ixtisaslaşdığı bəlli deyil. Amma hər halda 20 milyonluq şirkətin kondisinerlərin təmiri ilə məşğul olması bir qədər inandırıcı görünmür.

Geodeziya və Kartoqrafiya Agentliyi Ekologiya və Təbii Sərvərlər Nazirliyinə tabeli qurumdur. Agentliyin idarə heyətinin sədri Nazim İsmayılovdur.

Hurriyyet.az