Yüksək Texnologiyalar Parkı fəaliyyət göstərdiyi 7 il ərzində elmi-tədqiqat işlərinə investisiyaların cəlb olunmasına dəstək verir
Yüksək Texnologiyalar Parkı daxili bazarda Azərbaycan brendlərinin yaradılmasına dəstək verir.

Məlum olduğu kimi, rəqəmsal transformasiya dövründə əhəmiyyətli inkişafa nail olmaq, IV sənaye inqilabı proseslərindən geri qalmamaq, Azərbaycan elminin dünyada baş verən elmi-texnoloji proseslərdə aparıcı mövqe tutması üçün ölkəmizdə tətbiqi elm və biznes arasında inteqrasiya gücləndirilməli, süni intellekt sahəsində multidissiplinar tədqiqatlar aparılmalı, yüksəkixtisaslı kadrlar yetişdirməlidir. Bu gün bu istiqamətdə görülən işlərə yaxından dəstək verən, Azərbaycanda elmin kommersiyalaşdırılmasında iştirak edən, elmtutumlu, rəqabətqabiliyyətli və innovativ məhsulların istehsalını həyata keçirən, yenilikçi bizneslərin yaradılması istiqamətində özəl sektor, biznes şəbəkələri ilə əməkdaşlıq edən AR Elm və Təhsil Nazirliyinin Yüksək Texnologiyalar Parkının (YTP) yaranmasından 7 il ötür.

Azərbaycan Respublikası Prezidentinin 2016-cı il 8 noyabr tarixli Sərəncamı ilə yaradılmış Yüksək Texnologiyalar Parkı fəaliyyətə başladığı ilk gündən etibarən elmi nəticələri kommersiyalaşdırmağı, intellektual biznesin formalaşdırılması istiqamətində özəl sektor və akademik qurumlarla əməkdaşlıq etməyi qarşısına məqsəd qoymuşdur. Artıq 7 ildir ki, Yüksək Texnologiyalar Parkı elmi-tədqiqat işlərinə investisiyaların cəlb olunması, bu istiqamətdə sərmayə yatıran özəl sektora müəyyən güzəştlərin edilməsi və sahibkarlar üçün əlverişli innovativ biznes mühitinin yaradılması yolu ilə strateji hədəflərə doğru uğurla irəliləyir.

Azərbaycan Respublikası Prezidentinin elm və təhsilin qarşılıqlı əlaqəsinin möhkəmləndirilməsi və bu sahələrdə idarəetmənin təkmilləşdirilməsi məqsədilə “Azərbaycan Respublikasında elm və təhsil sahəsində idarəetmənin təkmilləşdirilməsi ilə bağlı bəzi tədbirlər haqqında” Fərman imzalaması ilə YTP 2022-ci ildə Elm və Təhsil Nazirliyinin tabeliyinə keçirilmişdir. Bu Sərəncam texnoparkın ali təhsil müəssisələri ilə daha sıx əməkdaşlıq etməsi üçün geniş imkanlar açmışdır.

Hazırda Parkın nəzdində 12 investisiya layihəsi üzrə 11 rezident və 2 inkubator rezident fəaliyyət göstərir. Bu müəssisələrdə prioritet istiqamətlərdə tədqiqatlar aparılır, onların nəticələri sənayedə, xidmət sahələrində uğurla tətbiq olunur. Rezidentlər elmlə istehsalat arasında birbaşa əlaqələrin yaradılmasında fəal rol oynayır.

YTP ölkəmizdə iqtisadiyyatın davamlı inkişafına və rəqabət qabiliyyətinin artırılmasına, müasir elmi və texnoloji nailiyyətlərə əsaslanan innovasiya və yüksək texnologiya sahələrinin genişləndirilməsinə, elmi tədqiqatların aparılmasına və yeni texnologiyaların işlənilməsi üzrə müasir komplekslərin yaradılmasına dəstəyini daha da artırmağı hədəfləyir.

Belə ki, 44 günlük Vətən müharibəsində torpaqlarımızın erməni işğalından azad edilməsi ilə qazanılan Zəfər nəticəsində hazırda dağıdılmış ərazilərdə irimiqyaslı quruculuq işlərinə başlanılması, ölkəmizdə aparılan innovativ islahatlar, biliklər iqtisadiyyatının formalaşması, smart texnologiyalara əsaslanan infrastruktur layihələrinin icrası istiqamətində görülən işlər heç şübhəsiz ki, qabaqcıl texnologiyalara söykənən, innovativ və elmtutumlu layihələri həyata keçirməyi nəzərdə tutan bir müəssisə kimi YTP qarşısında da yeni vəzifələr qoyur. Texnopark Qarabağda aparılan yenidənqurma və bərpa işlərində o cümlədən, “yaşıl cəmiyyət”in formalaşdırılması, innovativ ekosistemin yaradılması, azad olunmuş ərazilərin “yaşıl enerji” zonasına çevrilməsi, həmçinin “ağıllı şəhər” və “ağıllı kənd” konsepsiyalarının tətbiqi prosesində yaxından iştirak etmək niyyətindədir.

Hazırda Yüksək Texnologiyalar Parkı innovasiya yönümlü yeni texnologiyaların hazırlanması və təkmilləşdirilməsi istiqamətində fəaliyyətini davam etdirir. Elmlə biznesin vəhdətinin təşkilinə təkan verən texnopark yalnız ölkə daxilində deyil, həm də ölkə xaricində fəaliyyət göstərən elmi müəssisələrlə əməkdaşlıq edir. Həmçinin texnologiya və innovasiya sahəsində baş verən yeniliklərlə yaxından tanış olmaq məqsədilə müxtəlif ölkələrin texnoparkları, müvafiq qurumları ilə sıx əlaqədədir.

YTP-nin Koreya Elm və Texnologiya Siyasəti İnstitutu (STEPI) ilə 2017-ci ildə yaradılmış əməkdaşlıq əlaqələri bu gün uğurla davam etməkdədir. Hazırda iki qurum arasında Azərbaycanla K-İnnovasiya Tərəfdaşlığı Proqramı üzrə “Azərbaycanda Yüksək Texnologiyalar Parkının istismar proqramı: tətbiq və potensialın artırılması” layihəsinin icra olunur. Həmçinin STEPI ilə əməkdaşlıq çərçivəsində əsas məqsədi innovasiya ekosisteminin iştirakçıları arasında texnologiyanın transferi və elmin kommersiyalaşdırılmasına əsaslanan əməkdaşlığı təşkil etmək, innovasiya ekosisteminin formalaşması və inkişafına töhfələr vermək, innovativ imkanlarla zəngin əməkdaşlıq platformasını qurmaq, eləcə də Azərbaycanın innovasiya ekosistemini qlobal bazarlarla əməkdaşlığa əlçatanlığını təmin etmək olan Texnologiyaların Transferi və Kommersiyalaşdırılma üzrə Onlayn Platforma yaradılmışdır.

Nərgiz