Azərbaycan Milli Elmlər Akademiyasının Mərkəzi Elmi Kitabxanasında (MEK) yeni könüllülük proqramı çərçivəsində fəaliyyətə başlayan könüllülərlə görüş keçirilib.

Öncə MEK-in direktoru texnika elmləri doktoru Hüseyn Hüseynov könüllüləri salamlayıb və onlara uğurlar arzulayıb. O, qeyd edib ki, kitabxanada həyata keçirilən könüllülük fəaliyyəti gənclərin elmi, mədəni və sosial biliklərinin artırılmasına, həmçinin onların peşəkar bacarıqlarının formalaşmasına xidmət edir.
Direktor vurğulayıb ki, Mərkəzi Elmi Kitabxana hər zaman gənclərin inkişafına və təşəbbüslərinin dəstəklənməsinə böyük önəm verir və onların ideyalarına hər zaman açıqdır. Könüllülük yalnız təcrübə qazanmaq imkanı deyil, həm də kitabxana işi, informasiya texnologiyaları və elmi tədqiqat sahəsində biliklərini artırmaq üçün unikal bir platformadır.

Daha sonra MEK-in elmi katibi, könüllülər üzrə məsul şəxs Şəbnəm Rüstəmova çıxış edərək proqramın məqsədi və fəaliyyət istiqamətləri barədə ətraflı məlumat verib. O, könüllülərin iş qrafiki, cəlb olunacaqları şöbələr, onların funksiyaları və qarşıda duran vəzifələr haqqında danışıb. Şəbnəm Rüstəmova bildirib ki, könüllülər müxtəlif şöbələrdə praktiki işlərə cəlb olunacaq, oxucu xidməti, fondlar, kitabxana resurslarının rəqəmsallaşdırılması, komplektləşdirilməsi, kataloqlaşdırılması sahələrində bilik və bacarıqlarını təkmilləşdirəcəklər. Bundan əlavə, elmi katib kitabxananın saytı üzərindən oradakı bölmələr, elektron resurslar, tanınmış məlumat bazaları, rəqəmsal kitabxanalar haqqında məlumat verib və könüllülərə bütün bu imkanlardan sərbəst istifadə imkanlarının təqdim ediləcəyini də vurğulayıb.

Daha sonra könüllülər kitabxananın strukturu ilə yaxından tanış olub, onlara iş şəraiti, texniki avadanlıqlar və xidmət prosesi əyani şəkildə nümayiş etdirilib.