Azərbaycan Respublikası Mədəniyyət Nazirliyi, İrəli ictimai birliyinin, və Azərbaycan musiqi mədəniyyəti dövlət muzeyinin təşkilatçılığı ilə 6 dekabr 2025-ci il tarixində Maestro Niyazinin Mənzil-Muzeyində vokal sənəti üzrə Respublika və Beynəlxalq müsabiqələr laureatı Altun Süleymanovun solo konserti baş tutacaq. Gənc ifaçının bu solo çıxışı klassik musiqi mühitində xüsusi maraq doğuran mədəni tədbirlərdən biri kimi nəzərdə tutulur.
Konsert proqramı zəngin repertuar müxtəlifliyi ilə seçilir. Gecədə Azərbaycan və dünya bəstəkarlarının vokal əsərləri, klassik rus romansları, operalardan seçilmiş ariyalar və müxtəlif üslubları əhatə edən musiqi nümunələri səsləndiriləcək. İncə musiqi duyumu və profesional ifa üslubu ilə tanınan Altun Süleymanov bu proqram vasitəsilə həm milli vokal məktəbinin ənənələrini, həm də dünya klassik musiqisinin ifadə imkanlarını dinləyicilərə təqdim etməyi hədəfləyir.
Konserti piano müşayiəti ilə təcrübəli Konsertmeyster, Azərbaycan Milli Konservatoriyasının Pedaqoqu Rəhimə Qurbanova müşayiət edəcək. Musiqi axşamı sənətsevərlərə həm emosional dərinlik, həm də yüksək səviyyəli ifa estetikasını bir arada yaşatmağı məqsəd qoyur.
Bu tədbir həm gənc vokal ifaçısının yaradıcı fəaliyyəti, həm də klassik musiqi mühitində yeni təşəbbüslərin dəstəklənməsi baxımından əhəmiyyətli mədəni hadisə kimi dəyərləndirilir. Media nümayəndələrinin iştirakı mədəniyyətimizin işıqlandırılması və gənc istedadların tanıdılması üçün xüsusi önəm daşıyır.

Tarix: 6 dekabr 2025
Saat: 15:00
Məkan: Maestro Niyazinin Mənzil-Muzeyi
Ünvan: Bülbül prospekti 21