AZƏRBAYCAN DEMOKRAT PARTİYASI
İNFORMASİYA BÜLLETENİ № 13
17 MART 2025-Cİ İL.



ADP Rusiya ilə yalnız qarşılıqlı-faydalı əməkdaşlığın tərəfdarıdır, bundan uzağa gedən əməkdaşlığı Azərbaycanın dövlət maraqlarına uyğun hesab etmir…

Bu gün ADP İdarə Heyətinin ölkə və beynəlxalaq aləmdə baş verən ictimai-siyasi hadisələrə dair növbəti toplantısı keçirilib. Toplantı iştirakçıları dünya ictimaiyyətinin diqqətlə izlədiyi Rusiya-Ukrayna müharibəsində atəşkəsə nail olunması üçün ABŞ-ın moderatorluğu ilə aparılan danışıqlar müzakirə olunub. Son həftə ərzində aparılan danışıqlarda Ukraynanın atəşkəsə razı olmasına baxmayaraq, Rusiyanın bu məsələdə aydın bir mövqe ortaya qoymaması tənqid edilib. Qeyd edilib ki, Rusiya bu müharibədə işğalçı bir tərəf olduğu beynəlxalq ictimaiyyət tərəfindən, xüsusilə BMT qətnaməsi ilə tanınmalı və buna uyğun olaraq gərəkən addımlar atılmalıdır. Bu müharibənin sona çatdırılması beynəlxalq hüquq norma və prinsiplərinə uyğun olaraq Ukraynanın ərazi bütövlüyünün və suverenliyinin qorunub saxlanılmasına xidmət etməlidir. Əks halda Rusiyanın işğalçılıq siyasəti regional və beynəlxalq təhlükəsizlik üçün ciddi bir təhdid olaraq qalacaqdır.
İdarə Heyəti ötən həftə Suriyanın yeni hökuməti ilə kürdlərdən ibarət Suriya Demokratik Qüvvələri arasında imzalanan müqavilə ətrafında müzakirə aparıb. Müzakirələrdə müqaviləyə əsasən kürdlərin Suriyanın mərkəzi hakimiyyətinin təhlükəsizlik qüvvələrinə qoşulması təqdir edilib. Qeyd edilib ki, bu hadisə Suriyada vətəndaş sülhünə və əmin-amanlığa böyük töhvədir. Bu proseslərdə Türkiyənin oynadığı rol uğurlu bir siyasət kimi dəyərləndirilib və bu siyasətin Türkiyə tərəfindən Cənubi Qafqazda da reallaşdırılması arzuolunan hesab edilib.
İdarə Heyəti ötən həftə Azərbaycan rəsmi dairələri, o cümlədən Ermənistan rəsmi orqanları tərəfindən tərəflər arasında sülh müqaviləsinin mətninin tam razılaşdırılması ilə bağlı verilən açıqlamanı təqdir edib. İdarə Heyəti hesab edib ki, sülh müqaviləsi bölgənin təhlükəsizliyi naminə tez bir zamanda imzalanmalıdır. Müzakirələr zamanı istər Ermənistan, istərsə də Azərbaycan mediasında iki dövlət arasında müharibənin başlayacağı ilə bağlı yalançı materialların verilməsi tənqid edilib, bu hadisəni bölgədə sülhün yaranmasında maraqlı olmayan dairələrin fəaliyyətinin nəticəsi kimi dəyərləndirilib və bu tipli hərbi ritorikaya son qoyulmasının vacibliyi qeyd edilib.
İdarə Heyəti son zamanlar bir sıra Avropa və Qərb institutlarının həbsdə olan erməni əsilli separatçıların azadlığa buraxılması ilə bağlı Azərbaycan dövlətinə ünvanlanan çağırışları və təzyiqləri ətrafında müzakirələr aparıb. Müzakirələrdə qeyd edilib ki, Azərbaycan dövlətinə və xalqına qarşı xəyanət etmiş, ağır və xüsusilə ağır hərbi cinayətlər törətmiş erməni əsilli Azərbaycan vətəndaşlarının məhkəməsi şəffaf şəkildə həyata keçirilir, Qərbin və Avropanın bu şəxslərin azadlığa buraxılması ilə bağlı Azərbaycana təzyiqləri qəbuledilməzdir, həmin şəxslər ən ağır qaydada məsuliyyətə cəlb olunmalıdır. Anoloji hadisələrin Avropada olduğu zaman hərbi cinayətlərdə, separatçılıqda ittiham edilənlər ağır qaydada cəzalandırıldığı halda, Azərbaycana münasibətdə isə bu hadisələrə ikili stardartlı mövqenin ortaya qoyulması beynəlxalq hüququn mahiyyətinə ziddir və siyasi motivlidir.
İdarə Heyəti son zamanlar ölkədə vətəndaş cəmiyyəti institutlarının nümayəndələrinə, siyasi fəallara və media təmsilçilərinə qarşı həyata keçirilən həbslərdən bir daha narahatçılığını ifadə edib, indiki beynəlxalq şəraitdə Azərbaycana qarşı Qərbin və Avropanın təzyiqlərini yumşaltmaq məqsədilə həbsdə olan siyasi məhbuslar azad olunmasının, ümumiyyətlə siyasi motivli həbslərdə həbs qətimkan tədbirinin tətbiqini daha yüngül qətimkan tədbirləri ilə əvəz edilməsinin vacibliyi qeyd edilib.
İdarə Heyəti həmçinin ötən həftə Müsavat Partiyasının üzvü Tofiq Yaqublunun 9 il müddətinə azadlıqdan məhrum edilməsini də pisləyib, bu həbsi siyasi motivli olduğunu bildirib, indiki beynəlxalq şərtlər daxilində ölkədə vətəndaş həmrəyliyi istiqamətində edilən cəhdlərə zərbə kimi dəyərləndirib.
İdarə Heyəti qarşıdan gələn Novruz və Ramazan bayramı ərəfəsində ölkə başçısını humanistlik göstərərək siyasi məhbusları da əhatə edən geniş əfv fərmanı imzalamağa çağırıb. Hesab edilib ki, bu addım ölkədə milli həmrəyliyin möhkəmləndirilməsinə böyük töhvə olardı.
İdarə Heyətində ABŞ-ın Yəməndə Husilərə qarşı keçirdiyi hərbi əməliyyatı müzakirə olunub, həmin əməliyyatlar zamanı dinc insanların da həlak olmasından narahatçılıq keçirən müzakirə iştirakçıları, ABŞ prezidenti D.Trampın Rusiya-Ukrayna cəbhəsində sülhə çağırış etdiyi bir zamanda Yəməndə dinc insanların tələfatı ilə nəticələnən hərbi əməliyyatlar keçirməsini dünyadakı münaqişələrə ABŞ-ın ikili standartdan yanaşmasının təzahürü kimi qiymətləndirib. Hesab edilib ki, ABŞ Yaxın Şərqdəki bu münaqişənin də sülh yolu ilə nizama salınmasına çalışmalıdır.
İdarə Heyəti son zamanlar Azərbaycan-Rusiya münasibətlərində olan soyuq münasibətlərin normal məcraya yönləndirilməsi istiqamətində Rusiya tərəfindən atılan addımlar ətrafında da müzakirə aparıb. Müzakirələrdə Rusiya rəsmi şəxslərinin Azərbaycana səfərini iki dövlət arasında yaranmış soyuq münasibətlərin yoluna qoyulması istiqamətində edilən müsbət cəhd kimi dəyərləndirilib, eyni zamanda qeyd edilib ki, bizim Türkiyə və Pakistan kimi strateji müttəfiqlərimizin olduğu halda, Rusiya ilə yalnız qarşılıqlı-faydalı əməkdaşlığın tərəfdarıyıq, bundan uzağa gedən əməkdaşlıq Azərbaycanın dövlət maraqlarına uyğun deyil.
İdarə Heyəti sonda qarşıdan gələn Novruz Bayramı münasibəti ilə Azərbaycan xalqına təbrik ünvanlayıb. Novruz tonqallarının artıq Azərbaycanın hər bir guşəsində yandırılması şükranlıqla qeyd edilib, ölkəmizə əmin-amanlıq, hər bir ailəyə rifah və xoşbəxtlik arzu edilib.