Bu gün ADP İdarə Heyətinin ölkə və beynəlxalq aləmdə baş verən ictimai-siyasi proseslərə dair növbəti toplantısı keçirilib. Toplantı iştirakçıları ilk növbədə BMT Baş Assambleyasının 80-ci sessiyasının nəticələri ilə bağlı məsələlərə münasibət bildirib. Partiya yetkililəri dövlət başçısı İ.Əliyevin sessiyada etdiyi çıxışın, 30 il icrasız qalan BMT qətnamələrinin sonda dövlətimizin öz gücü ilə həllini tapması, bundan sonrakı dövr ərzində sülh sazişinin bağlanması istiqamətində göstərdiyi ciddi səylərin davam etməsi barədə səsləndirdiyi bəyanatların Azərbaycanın milli və dövlət maraqlarına xidmət etməsi baxımdan təqdirə layiq olduğunu qeyd etməklə yanaşı, bu qurumun artıq beynəlxalq problemlərin, qanlı münaqişələrin həllində aciz qaldığını diqqətə çatdırıb və yeni dünya düzəninə uyğun daha mükəmməl, daha çevik beynəlxalq bir qurumun yaradılmasına ehtiyac duyulduğunu qeyd edib.
İdarə Heyəti son vaxtlar sosial şəbəkələrdə separatizm meyillərinin təşviqi ilə bağlı materialların gündəmə gəlməsindən, etnik separatist meyillərin təzədən qızışdırılmasından, qardas Türkiyə ilə Azərbaycan arasında ədavətin körüklənməsinə xidmət edən məqsədyönlü və təxribat xarakterli məlumatların tirajlanmasından ciddi narahat olduğunu bildirib və hakimiyyət orqanlarını düşmən dövlətlərin əli ilə yayımlanan bu cür pozucu hallara qarşı ayıq-sayıq olmağa və əks təbliğat işini gücləndirməyə səsləyib.

İdarə Heyəti 28 sentyabr Anım günü ilə əlaqədar 44 günlük Vətən müharibəsində, eləcə də bundan əvvəl və sonrakı dövrdə həlak olan hərbçi və mülki vətəndaşlarımızın şəhadətə qovuşmasını dərin hüznlə yad edib, onların ailələrinə, bütövlükdə Azərbaycan xalqına başsağlığı ünvanlayıb. Qeyd olunub ki, dövlət şəhid olan övladlarını, qazilərini heç vaxt unutmamalı, onların Azərbaycan xalqının müstəqilliyi, suverenliyi uğrunda apardığı qəhrəmanlıq nümunələrini dərsliklərdə, bədii əsərlərdə, filimlərdə təcəssüm etdirməli və onların ruhunun şad olması üçün cəmiyyətimizin rifah halında yaşaması, sosial-iqtisadi həyatının yaxşılaşdırılması, insan hüquq və azadlıqları ilə təmin olunması üçün effektli tədbirlər görməlidir.

İdarə Heyəti son vaxtlar güclü yağıntılar nəticəsində bərpa-quruculuq işlərinin aparıldığı işğaldan azad edilən ərazilərimizdə bir neçə yaşayış məntəqəsinin, tikilən körpülərin, çəkilən yolların sel altında qalması faktına diqqət çəkib və bu tikintilər üçün kifayət qədər maliyyə vəsaiti ayrılmasına baxmayaraq, ayrı-ayrı sifarişçi təşkilatlar, tender qalibləri tərəfindən mənimsəmələr, aparılan yararsız işlər nəticəsində böyük dağıntılar baş verməsindən ciddi narahat olduğunu bildirib və hakimiyyət yetkililərini bu sahəyə məsul şəxslərin cəzalandırılmasına çağırıb.

İdarə Heyəti ictimai nəqliyyatda gediş haqqının artırılması məsələsinə münasibət bildirib və bu tədbirin ictimai nəqliyyat xidmətinin keyfiyyətinin davamlı olaraq yüksək səviyyədə saxlanılması və avtobus parkının yenilənməsi, yeni metro stansiyalarının salınması, daha müasir tələblərə cavab verən vaqonların alınması məqsədi ilə həyata keçirilməsini qeyd etməklə, aşağı əməkhaqqı şəraitində bu artımların əhalinin aztəminatlı hissəsinin güzəranına mənfi təsir göstərməsindən narahat olduğunu bildirib. İdarə Heyəti istər istehlak bazarında müşahidə olunan kəskin qiymət artımı, istərsə də ictimai nəqliyyatda gediş haqqının artırılması müqabilində dövlətin minimum əməkhaqqı məbləğinin artırmasına, az təminatlı ailələrə bu və ya digər formada sosial yardım edilməsinə doğru addımlar atmasının vacibliyini xüsusi qeyd edib.