Paytaxtın Nərimanov rayonu ərazisində qeydə alınan yol hərəkəti qaydası pozuntusu ilə bağlı tətbiq edilən cərimə narazılığa səbəb olub. Sürücü Abıyev Cəlal Hamlet oğlu bildirir ki, idarə etdiyi 77 AX 393 dövlət qeydiyyat nişanlı nəqliyyat vasitəsinə tətbiq edilən cərimə əsassızdır.

Onun sözlərinə görə, hadisə zamanı yaşadığı ünvana daxil olmaq üçün qısa məsafədə dönmə manevri edib. Sürücü qeyd edir ki, yolun həmin hissəsində qırıq xətlərin olması dönmə əməliyyatına imkan verir və o, bu manevri edərkən dönmə siqnalından da istifadə edib.

Buna baxmayaraq, vətəndaşın barəsində 100 manat məbləğində inzibati cərimə tətbiq olunub və ona 2 cərimə balı yazılıb.

Məsələnin diqqət çəkən tərəfi isə sübutlarla bağlıdır. Sürücü iddia edir ki, inzibati xəta ilə bağlı sistemdə mövcud olan video görüntülər onun müraciətindən sonra silinib və hazırda yalnız fotoşəkillər saxlanılıb. Halbuki, mübahisəli hallarda video görüntülər hadisənin tam mənzərəsini müəyyən etmək üçün əsas sübut hesab olunur.

Ekspertlərin fikrincə, yalnız fotoşəkillərə əsaslanaraq belə hallarda obyektiv qərar vermək çətindir. Xüsusilə də sürücünün avtobus zolağında hərəkət edib-etməməsi və ya yalnız qısa məsafədə dönmə məqsədilə həmin zolağa daxil olması kimi məqamlar video olmadan tam aydınlaşdırıla bilməz.

Vətəndaş bildirir ki, məsələ ilə bağlı əvvəlcə Bakı şəhər Dövlət Yol Polisi İdarəsinə müraciət edib. Daha sonra ona Respublika Baş Dövlət Yol Polisi İdarəsinə, oradan isə Nərimanov rayon Dövlət Yol Polisi şöbəsinə müraciət etməsi tövsiyə olunub. Sonuncu instansiyada isə ona bildirilib ki, cəriməyə etiraz edirsə, məhkəməyə müraciət etməlidir.

Hüquqşünaslar qeyd edirlər ki, inzibati icraat zamanı sübutların tam və dəyişdirilməz şəkildə saxlanılması vacibdir. Əgər texniki vasitə ilə qeydə alınmış video material təqdim olunmursa və ya sonradan silinibsə, bu, qərarın obyektivliyinə şübhə yarada bilər.

Məsələ ilə bağlı aidiyyəti qurumların mövqeyi hələlik açıqlanmayıb.