Müğənni Nura Suri səsləndirdiyi fikirlərlə yenidən gündəmə gəlib. Sənətçinin açıqlaması sosial şəbəkələrdə geniş müzakirələrə səbəb olub. O, mərhum nənəsi ilə bağlı xatirələrindən danışarkən fərqli düşüncələri ilə diqqət çəkib.

Nura Suri bildirib ki, ən yaxın insanlarından biri olan nənəsini tez-tez xatırlasa da, qəbir ziyarətinə getməyə xüsusi ehtiyac duymur. Onun sözlərinə görə, dünyasını dəyişən insan artıq başqa bir aləmdədir və qəbir üstünə getməyin həmin şəxsə nə verdiyini anlamır.

İfaçı əlavə edib ki, nənəsinin şəkli daim onun yanında, yataq otağında yerləşir və bu, onun üçün daha mənəvidir. O, həmçinin ölümündən sonra insanların onun üçün ağlayıb-ağlamamasının və ya ziyarətə gəlib-gəlməməsinin onun üçün əhəmiyyət daşımadığını vurğulayıb.

Sənətçi insanların fikirlərinə çox önəm vermədiyini də qeyd edib. O bildirib ki, həyatında baş verən yaxşı və ya pis hadisələrdə kənardan fikir bildirən şəxslərin heç bir rolu yoxdur:
“Ən əziz insanım nənəm olub, artıq rəhmətə gedib. Yadıma gəlmir ki, sonuncu dəfə nə vaxt qəbir üstünə ziyarətə getmişəm. Mənə çatmır ki, ora getmək torpağa qarışmış insana nə verir? Başqa dünya varsa, o artıq oradadır. Mən qəbir üstünə getməklə nə etmək istəyirəm ki? Nənəmin şəkli mənim yatağımın yanındadır. Öləndən sonra kimsə gəldi-gəlmədi, ağladı-ağlamadı - bunlar məni maraqlandırmır. İnsanların fikrinə o qədər də önəm vermirəm. Həyatımda baş verən yaxşı və ya pis hadisələrdə həmin danışan insanların heç bir rolu yoxdur”.

Bu açıqlama izləyicilər arasında fərqli reaksiyalar doğurub. Bəziləri onun fikirlərini səmimi və fərdi yanaşma kimi qəbul etsə də, digərləri bu mövqeni tənqid edərək ənənəvi dəyərlərlə ziddiyyət təşkil etdiyini bildiriblər.