Sumqayıt şəhəri 37 nömrəli tam orta məktəbdə baş verən son hadisələr təhsil ictimaiyyətində ciddi narahatlıq yaradıb. Vaxtilə məktəbin direktoru vəzifəsində çalışan Elşad Eyvazovun yaş həddi ilə vəzifəsindən çıxarılmasına baxmayaraq, müəmmalı şəkildə yenidən məktəbə "Təşkilatçı layihə rəhbəri" adı altında direktor müavini kimi geri döndüyü bildirilir.

Məlumata görə, direktor səlahiyyətləri rəsmi olaraq müavin Zöhrə Quliyevaya həvalə edilsə də, bütün səlahiyyətlərin faktiki olaraq yenidən Elşad Eyvazovun əlində cəmləşdiyi iddia olunur. Mənbələr bildirir ki, bu təyinatın arxasında ciddi maraqlar və "xüsusi səbəblər" dayanır.

Hadisələrlə bağlı daha ciddi rezonansa səbəb olan məqam isə UBTR vəzifəsini icra etmiş bir xanım müəllimənin gecə saatlarında Elşad Eyvazov tərəfindən WhatsApp vasitəsilə təhqir və hədə-qorxu dolu səs yazıları almasıdır. Bakunews.az xəbər portalında yayımlanan Həmkarlar İttifaqının sədri Elgün Quliyevin korrupsiya iddialarının səs yazısı ictimaiyyətdə geniş əks-səda doğurub.

İddialara əsasən, bu səs yazısından sonra Elşad Eyvazov və hazırkı direktor səlahiyyətlərini icra edən Zöhrə Quliyeva birlikdə həmin xanım müəlliməyə qarşı təhdid və təhqir hücumlarına başlayıblar.

Mövzu ilə bağlı Abşeron-Xızı Regional Təhsil İdarəsinin və müvafiq hüquq-mühafizə orqanlarının məsələyə müdaxilə edəcəyi gözlənilir. Müəllimlər isə təhsil müəssisəsində sağlam idarəçilik mühitinin bərpa olunmasını tələb edirlər.

Məsələ ilə bağlı Abşeron-Xızı Regional Təhsil İdarəsinə rəsmi sorğuda verilmişdir. Sorğuya veriləcək cavab olduğu kimi oxuculara təqdim ediləcəkdir.

Qarşı tərəflərin mövqeyni dinləməyə hazırıq.