Bu gün 20 Yanvar faciəsindən 36 il ötür. Sovet faşizminin Azərbaycan xalqına qarşı törətdiyi bu qanlı cinayət tariximizin qan yaddaşı, ən ağrılı və unudulmaz səhifələrindən biridir.

Bu münasibətlə ölkə üzrə dövlət qurumları və təşkilatlar Şəhidlər xiyabanını ziyarət edir, 1990-cı ilin yanvarında azadlıq uğrunda canından keçən insanların xatirəsini ehtiramla yad edirlər. Quba-Xaçmaz Regional Təhsil İdarəsinin və tabeliyində olan qurumların da bu ziyarətdə iştirakı təqdirəlayiq haldır.

Lakin cəmiyyətdə ciddi suallar doğuran bir məqam diqqətdən yayınmayıb.

20 Yanvar anım günü çərçivəsində Quba-Xaçmaz Regional Təhsil İdarəsinin müdiri Coşqun Əliyevin Böyük Vətən Müharibəsində həlak olmuş əsgərlərin xatirəsinə ucaldılmış abidə önünə gül dəstəsi qoyması ilə bağlı yayılan görüntülər ictimaiyyət tərəfindən birmənalı qarşılanmayıb.

Burada çox sadə, amma cavabı açıq olan bir sual ortaya çıxır:
Böyük Vətən Müharibəsində vuruşan ordu Sovet ordusu deyilmi?

Tarixi faktlar dəyişməzdir. 1941–1945-ci illərdə aparılan Böyük Vətən Müharibəsində döyüşən ordu SSRİ-nin Qızıl Ordusu — yəni Sovet ordusu idi. Azərbaycanlı əsgərlər də məhz bu ordunun tərkibində vuruşublar.

Eyni Sovet ordusu 1990-cı ilin 20 Yanvarında Bakıya tanklarla daxil olaraq dinc, silahsız əhaliyə qarşı qətliam törədib.

Fərqli dövrlər, fərqli məqsədlər ola bilər. Amma ordu eynidir. Və məhz buna görə 20 Yanvar anım günündə Sovet ordusuna bağlı hər hansı abidənin, rəmzin və ya simvolun önünə gül qoyulması cəmiyyətin bir hissəsində haqlı narahatlıq doğurur.

Bu, Böyük Vətən Müharibəsində həlak olmuş azərbaycanlı əsgərlərin fədakarlığını kiçiltmək deyil. Amma 20 Yanvar günü yalnız və yalnız sovet ordusunun cinayətinin qurbanı olmuş insanların xatirəsinə həsr edilməlidir.

Hər tarixi hadisənin öz günü, öz ünvanı və öz mənası var. 20 Yanvarı ümumi “tarixi anım” gününə çevirmək faciənin mahiyyətini kölgədə qoyur.

Tarixə hörmət — onu düzgün anlamaqdan və düzgün ayırmaqdan başlayır.