Xaçmaz rayonunun Ağtala və Uznoba kəndlərində baş verən son hadisələr bir daha göstərdi ki, təbii fəlakət adı altında təqdim olunan bir çox hallar əslində məsuliyyətsizliyin və nəzarətsizliyin nəticəsidir. Qusar çayından ayrılan qolun nəzarətsiz qalması, bəndin açıq vəziyyətdə saxlanılması və vaxtında müdaxilə edilməməsi kəndləri sözün həqiqi mənasında iflic edib.

Bntv.az xəbər verir ki, sakinlər günlərlə su içində qalan evlərdə yaşamaq məcburiyyətindədir. Təsərrüfatlar məhv olub, yollar yararsız vəziyyətə düşüb, gündəlik həyat dayanıb. Ən narahatedici məqam isə odur ki, bu vəziyyət gözlənilməz olmayıb – yerli əhali riskin əvvəlcədən mövcud olduğunu dəfələrlə aidiyyəti qurumların diqqətinə çatdırıb.

Bəs bu vəziyyətə görə kim məsuliyyət daşıyır?

Bir tərəfdə Azərbaycan Dövlət Su Ehtiyatları Agentliyi və onun yerli strukturları, digər tərəfdə isə Ekologiya və Təbii Sərvətlər Nazirliyi dayanır. Bu qurumların əsas vəzifəsi su ehtiyatlarının düzgün idarə olunması, çayların məcrasının nəzarətdə saxlanılması və belə risklərin qarşısının alınmasıdır. Lakin baş verənlər göstərir ki, ya bu vəzifələr yerinə yetirilməyib, ya da ümumiyyətlə məsuliyyət hissi arxa plana atılıb.

Ortaya çıxan əsas suallar bunlardır:

- Niyə bənd vaxtında bağlanmayıb və ya suyun istiqaməti nəzarət altına alınmayıb?
- Aidiyyəti qurumlar ərazi üzrə monitorinq aparıbmı, aparıbsa nəticə niyə sıfırdır?
- Sakinlərin əvvəlcədən etdiyi xəbərdarlıqlara niyə məhəl qoyulmayıb?
- Bu səhlənkarlıq nəticəsində dəyən ziyana görə kim cavab verəcək?
- Məsul şəxslər hansı hüquqi əsaslarla və nə vaxt cəzalandırılacaq?
- Dövlət büdcəsindən ayrılan vəsaitlər doğrudanmı təyinatı üzrə istifadə olunub?

Bu sualların cavabsız qalması yalnız bir kəndin deyil, bütövlükdə regionun gələcəyi üçün təhlükə siqnalıdır. Əgər bu gün məsul şəxslər konkret şəkildə cəzalandırılmasa, sabah eyni ssenari başqa bir rayonda təkrarlanacaq.

Məsələ yalnız texniki problem deyil – bu, idarəetmə böhranıdır. Vətəndaşın təhlükəsizliyi və rifahı təmin olunmadıqca, dövlət qurumlarına olan inam da ciddi zərbə alır.

Artıq söz yox, konkret addımlar tələb olunur: hadisəyə hüquqi qiymət verilməli, səhlənkarlığa yol verən vəzifəli şəxslər məsuliyyətə cəlb olunmalı, zərərçəkənlərə kompensasiya ödənilməlidir. Əks halda, “təbii fəlakət” adı altında ört-basdır edilən bu kimi hallar davam edəcək və ən böyük ziyanı yenə sadə vətəndaş çəkəcək.

Aidiyyatı qurumların mövqeyni dinləməyə hazırıq.