“Dünya istər Qarabağda, istərsə də İsrailin cənubunda baş verən zorakılıq və
insanlığa qarşı cinayətlərə qarşı tədbir görməlidir”.
Bu barədə Dona Qrasiya Diplomatiya Mərkəzinin təsisiçisi və baş direktoru,
tanınmış siyasi şərhçi və jurnalist Reyçel Avraham ABŞ-ın populyar “The Jewish
Press” nəşrində dərc olunmuş məqaləsində yazıb.
“Qaradağlı və Xocalı qətliamları 7 oktyabr hadisələrinin müjdəçisi oldu” sərlövhəli
məqalədə qeyd olunub ki, dünya azərbaycanlıları ermənilər tərəfindən 32 il bundan
öncə azərbaycanlılara qarşı etnik zəmində törədilmiş Qaradağlı və Xocalı
qətliamlarının qurbanlarının xatirəsini anır.
Eyni zamanda diqqətə çatdırılıb ki, keçən il oktyabrın 7-də İsraildə olduğu kimi,
1992-ci il fevralın 17-də də Azərbaycanın Qaradağlı kəndi Ermənistan silahlı
qüvvələri tərəfindən işğal edilərək yandırılıb, 118 kənd sakini girov götürülüb və
bu girovlar da israilli girovlar kimi ağır işgəncələrə məruz qalıblar. Bir neçə gün
sonra isə ermənilər Xocalıda miqyasca daha böyük cinayəti reallaşdırıblar. Onlar
uşaqlar, qadınlar və qocalar da daxil olmaqla burada 613 dinc azərbaycanlı sakini
qətlə yetiriblər. Müəllif hər iki cinayət fonunda israilli qadınlar kimi, azərbaycanlı
qadınların da zorlamaya məruz qaldığını vurğulayıb.
Məqalədə İsrailn sabiq Prezidenti Reuven Rivlindən də sitata gətirilib: “Bu gün biz
özümüzə vicdanla sual verməliyik: soyqırıma qarşı mübarizəmiz kifayət qədər
effektivdirmi? Bosniyada kifayət qədər təsirli oldumu? Xocalıdakı qətllərin
qarşısının alınmasında təsirli oldumu? Taliban rejimində və Suriyada kifayət qədər
effektivdirmi? Yoxsa Nigeriyada “Boko Haram”ın vəhşiliklərinə qarşı nəsə edə
bilirik? Bəlkə çox göz yaşı töküb, az tədbir görürük? Terrorizm qan qrupları
arasında fərq qoymur. Bu müharibədə hamımız, bütün birləşmiş millətlər, azad
dünya ölkələri vahid cəbhə yaratmalıyıq”.
Məqaləni ətraflı şəkildə aşağıdakı linkdən oxumaq mümkündür:
https://www.jewishpress.com/indepth/opinions/qaradaghli-and-khojaly-massacres-
were-precursors-to-october-7/2024/02/22/