"Servis+" MTK ətrafında bir ilə yaxındır davam edən məhkəmə mübahisəsi yeni və daha qalmaqallı mərhələyə qədəm qoyub. Kooperativin əsas təsisçiləri Ali Məhkəmənin, Məhkəmə Hüquq Şurasının sədri İnam Kərimova, ədliyyə naziri Fərid Əhmədova, Bakı Apellyasiya Məhkəməsinin sədri Mübariz Əhmədova müraciət ünvanlamaqla Bakı Kommersiya Məhkəməsində baş verən qanunsuzluqlara son qoyulmasını xahiş ediblər. Bildiriblər ki, məhkəmənin iş üzrə son qərardadı qanunsuz tikinti və mənzil satışlarının qarşısını almaq əvəzinə, əvvəllər dələduzluğa görə məhkum olunmuş layihə rəhbəri Arzu Kazımovun faktiki idarəçiliyini davam etdirməsinə şərait yaradıb. Onların sözlərinə görə məhkəmənin bu mövqeyi artıq yalnız mülki mübahisə deyil, məhkəmə sisteminin qərəzsizliyi ilə bağlı ciddi suallar doğurur. Bildiriblər ki, məhkəmə qarşı tərəfin maraqları daxilində iclası bir neçə dəfə təxirə salıb, prosesi sanki bir auksiona çevirib.  

Redaksiyamıza təqdim olunan sənədlərə əsasən, "Servis+" MTK-nın nizamnamə kapitalının 71,2 faizinə sahib olan əsas investorlar təxminən bir il əvvəl kooperativin idarəçiliyindən kənarlaşdırılıb. Bundan sonra əvvəllər dələduzluğa görə məhkum olunmuş layihə rəhbəri Arzu Kazımov Qaradağ rayonu, Lökbatan qəsəbəsində inşa edilən 8 bloklu, 16 mərtəbəli yaşayış kompleksini tikən kooperativ üzərində faktiki nəzarəti tam ələ keçirib, nəvəsi Kamal Məmmədovu MTK sədri elan edib və qanunsuz mənzil satışlarına başlayıb.

Əsas təsisçilər bildirirlər ki, həmin vaxtdan bəri məhkəmə çəkişmələrinə və müxtəlif dövlət orqanlarının qərarlarına baxmayaraq yaşayış kompleksində mənzillərin satışı davam etdirilir, kooperativin vəsaitləri üzərində sərəncam verilir və investorların hüquqları kobud şəkildə pozulur.

Onların sözlərinə görə, 2026-cı ilin yanvarında Bakı Kommersiya Məhkəməsi iddia təminatı tədbiri kimi MTK-da mənzillərin satışını və digər sərəncam əməliyyatlarını qadağan edən qərardad qəbul edib. Qərardadın icrası məqsədilə Qaradağ Rayon İcra Şöbəsi tərəfindən rəsmi xəbərdarlıqlar edilib və icra tədbirlərinə başlanılıb.

Təsisçilər bildirirlər ki, buna baxmayaraq Arzu Kazımovun rəhbərliyi altında mənzil satışları davam etdirilib. Bu faktın Qaradağ Rayon İcra Şöbəsinin icra məmurları tərəfindən də müəyyən olunduğu, bundan sonra isə Arzu Kazımovun nəvəsi, MTK sədri Kamal Məmmədov barəsində inzibati protokol tərtib edildib. Qaradağ Rayon Məhkəməsi Kamal Məmmədovu qanunsuz satışlara görə cərimələyib və mənzil satışlarının bir daha qadağan olunduğu qeyd edib. Bundan sonra da  qanunsuz mənzil satışı dayanmayıb, Arzu Kazımovun rəhbərliyi altında nəvələri MTK-da mənzil satmaqda davam ediblər və bu gün də edirlər. Bakı Apellyasiya Məhkəməsi Qaradağ Rayon Məhkəməsinin qərardadını qüvvədə saxlasa da, bu da azğınlaşmış, məhkəmə qərarlarını heçə sayan Arzu Kazımovu dayandırmayıb, MTK-da mənzil satışı davam edir.   

Arzu Kazımovun MTK-dakı qanunsuz fəaliyyətini durdurmaq üçün təsisçilərin ümumi yığıncağı keçirilib, Kamal Məmmədov vəzifədən uzaqlaşdırılıb, Zəka Zeynalov MTK-nın yeni sədri və qanuni təmsilçisi seçilib. Bu dəyişiklik dövlət reyestrində də rəsmiləşdirilib.

Dövlət reyestrində qanuni rəhbər kimi qeydiyyata alınmasına baxmayaraq, Zəka Zeynalov bu günədək kooperativin ofisinə daxil ola bilmir. Arzu Kazımov zorakılıqla, şantaj və şərləmələrlə məhkəmə qərarlarının və dövlət reyestrinin tələblərinə məhəl qoymur, faktiki idarəçiliyi zorakılıqla əlində saxlamaqda davam edir.

Təsisçilərin sözlərinə görə, MTK-nı nəzərətində saxlamaq üçün Arzu Kazımov Bakı Kommersiya Məhkəməsini də qanunsuz fəaliyyətinə alət etməyi bacarıb.

Belə ki, təsisçilər yeni sədr Zəka Zeynalovun Arzu Kazımov tərəfindən MTK-ya girməsinə məhdudiyyət yaratmasına qadağa qoyulması, gələcəkdə MTK-nın normal fəaliyyətinin təmin olunması üçün Bakı Kommersiya Məhkəməsinə müraciət ediblər. Məhkəmədən Arzu Kazımov və başına yığdığı qanunsuz dəstənin kooperativ ofisindən qeyri-qanuni istifadələrinin qarşısınının alınması, kooperativin sənədlərinin qorunması və fiziki maneələrin qarşısının alınması məqsədilə müvəqqəti təminat tədbirlərinin görülməsini xahiş ediblər. Bakı Kommersiya Məhkəməsi bu ilin yanvarında Arzu Kazımovun rəhbərlik etdiyi dəstəyə MTK-da mənzil satışını qadağa edən qərardad versə də, ötən gün – iyulun 14-də çıxardığı qərardadla onun qanunsuzluqlarına yol açıb.

 Təsisçilər deyirlər ki, bu qərardad faktiki olaraq mövcud vəziyyətin dəyişmədən saxlanılmasına, əmlak üzərində Arzu Kazımovun qanunsuz nəzarətinin davam etməsinə və yeni qanunsuz əməliyyatları üçün şərait yaranmasına səbəb olur. Eyni zamanda MTK-da gerçəkləşən və qanunsuz satılan mənzilləri alan çoxsaylı vətəndaşları da çox çətin duruma salır.

Onlar bildirirlər ki, bu qərar həmin məhkəmənin 2026-cı ilin yanvarında qəbul etdiyi və mənzil satışlarını qadağan edən qərardadla açıq ziddiyyət təşkil edir. Onların fikrincə, son qərardad Arzu Kazımovun fəaliyyətinin davam etdirilməsinə hüquqi zəmin yaradır.

O, vəkili Ruslan Umudov vasitəsilə Bakı Kommersiya Məhkəməsinin sədri İlham Əhmədovla əlaqələrinin olduğunu gizlətmir və müxtəlif məhkəmə instansiyalarına təsir imkanlarından danışır. Təsisçilər deyirlər ki, məhz buna görə Arzu Kazımov özünü toxunulmaz hiss edir və məhkəmə qərarlarının icrasından demonstrativ şəkildə yayınır.

Təsisçilər hüquq-mühafizə orqanlarına, Məhkəmə-Hüquq Şurasına və digər aidiyyəti dövlət qurumlarına müraciət edərək Bakı Kommersiya Məhkəməsinin əvvəlki qərardadlarının icrasının təmin olunmasını, kooperativin sənədlərinin və əmlakının mühafizə altına götürülməsini, mənzil satışlarının dayandırılmasını və qanuni idarəetmənin bərpa edilməsini xahiş edirlər.