Hər ölkənin, millətiin və şəhərin siması var.

Bakının da siması İçərişəhərdir.

Simamımızı qoruduğumuz kimi, şəhərimizin simasını la hifz etməli, onu eybəcərləşdirməməliyik.

Həyatda əməli, ağlı və davranışı ilə indiyədək iz qoya bilməyənlər İçərişəhərdə qala divarlarına cızmaqaralar yazaraq iz qoymağa çalışırlarsa, bu, troqlodit məntiqidir.

Mağara adamının davranışıdır bu.

İbtidai icma quruluşunda kaha, zağa və mağara divarlarına şəkillər çəkən insan kamilləşəməyə can atırdısa, indi İçərişəhərdə divarlara yazıları cızan və boyayanlar abdallaşmağa doğru gedirlər.

Təkamül yox, tənəzzüldür bu.

Məhz bəhs etdiyimiz səbəbdən "İçərişəhər" Dövlət Tarix-Memarlıq Qoruğu İdarəsinin ictimaiyyətə müraciət edib.

Müraciətdə deyilir:

"İçərişəhər və Qala Qoruğu kimi tanınan məkan Bakının və bütövlükdə ölkəmizin ən dəyərli incisi, eyni zamanda tarixi memarlıq abidələrinin mühafizə olunduğu qoruqdur. İçərişəhər və Qala Qoruğu müxtəlif mədəniyyətlərin, dini inancların, təzadların ahəngdarlıqla qovuşaraq mükəmməl harmoniya yaratdığı əfsanəvi məkan olmaqla yanaşı qədim tarixə və zəngin mədəniyyətə malik Azərbaycan xalqının milli sərvətidir.

Ölkəmizin orta əsrlərdə yüksək inkişaf etmiş şəhərsalma sənətinin misilsiz yadigarı olan bu unikal məkanlardakı dünya, ölkə və yerli əhəmiyyətli memarlıq və tarixi abidələr Azərbaycan memarlığının parlaq nümunələridir və Azərbaycan Respublikası Konstitusiyasının 77-ci maddəsinə görə bu abidələri qorumaq hər bir şəxsin borcudur. Əsirlər sınağından keçmiş mədəni irsimizin bu günə qədər qorunub saxlanılması dövlətin siyasəti, cəmiyyətin mədəni irsimizə münasibəti və hər bir fərdin məsuliyyəti sayəsində baş vermişdir.

Lakin təəssüflə qeyd etməliyik ki, "İçərişəhər" Dövlət Tarix-Memarlıq Qoruğu İdarəsi tərəfindən aparılan monitorinq zamanı bəzən xoşagəlməz hallar müəyyən edilir. Qeyd olunan tarixi abidələrin bədii-estetik görünüşünü pozan vandalizm aktları ilə bağlı daima hüquq mühafizə orqanları ilə əməkdaşlıq edilir. Hüquq mühafizə orqanları ilə bu sahədə edilən əməkdaşlıq hər zaman öz töhfəsini verir. Məlumat üçün bildiririk ki, tarixi abidələrə qarşı yol verilən hüquqazidd əməllər məsuliyyət yaradır və Azərbaycan Respublikası İnzibati Xətalar məcəlləsinə, eyni zamanda Cinayət məcəlləsinə əsasən məsuliyyətə cəlb olunmağa əsasdır. Lakin zərər vuraraq cəza almaqdan fərqli olaraq mədəni irsimizə hörmətlə yanaşıb onu qorumaq hər bir vətəndaşın məsuliyyəti və borcudur.



Hörmətli həmvətənlər, tarixi-mədəni abidələrin qorunması hər bir kəsdən aslıdır! Mədəni irsi gələcək nəsil üçün qorumaq hər birimizin mənəvi borcu və məsuliyyətidir. Tariximizi birlikdə qoruyaq!"

Xatırladaq ki, bir qədər əvvəl mediada və sosial şəbəkələrdə İçərişəhərin Qala divarında törədilən vandalizm aktı barəsində məlumatlar yayılıb.

Olayla bağlı Daxili İşlər Nazirliyi xüsusi açıqlama ilə çıxış etmişdi.

Qala divarlarına barbarcasına yazılar yazanlar müəyyənləşib və bunu edən şəxslər saxlanılıblar.

Lakin həmin yazıların təmizlənməsi xüsusi qaydada həyata keçirildiyi üçün xaricdən mütəxəssislər dəvət edilib. Hazırda onların gəlişi gözlənilir.

... İçərişəhəri şüurları emosiyaları boyda olanlar yazsın, dövlət də o yazıları və primitiv rəsmləri silərək divarları əvvəlki halına qaytarmaq üçün mütəxəssis dəvət etsin.

Bəlkə divar yox, şüur və əxlaqın normaya salınması üçün mütəxəssis çağıraq belələri üçün?\milli.az

bakunews.az