Prezident İlham Əliyev cənablarının sərəncamı ilə Dövlət Şəhərsalma və Arxitektura Komitəsinin səlahiyyətlərinin artırılmasından sonra paytaxta aparılan tikintilərin normativ qaydalara uyğunlaşması, Bakı şəhərinin ümumi Baş planı ilə əlaqələndirilməsi istiqamətində mühüm addımlar atıldı. Komitə rəhbərliyinin qısa zaman ərzində işlək vəziyyətə gətirdiyi tikinti qaydalarının və tikintiyə icazənin sadələşdirilməsi sadə vətəndaşları sevindirsə də, bu sahədə əvvəllər böyük miqdarda vəsaitlər qazanan bəzi rayon icra hakimiyyətlərinin heç də ürəyindən olmadı. Hələ də bəzi icra hakimiyyətlərinin başçıları səlahiyyətlərindən sui-istifadə edərək qanunsuz tikintilərə şərait yaradırlar.

AzFakt.com xəbər verir ki, qanunsuz tikintilərə "yaşıl işıq" yandıran dövlət qurumlarından biri də Xətai rayon İcra Hakimiyyətinin başçısı Rafiq Quluyevdir.

Rafiq Quluyevin "qayğısı" ilə inşa edilən qanunsuz tikintilərdən biri də Xətai rayonunun Qədir Məmmədov küçəsində aparılır.

Ümumi sahəsi 1000 kvadrat metrdən artıq olan tikintinin Rafiq Quluyevin yaxın dostuna məxsus olduğu bildirilir.

Obyektin tikintisi üçün Dövlət Şəhərsalma və Arxitektura Komitəsindən rəsmi icazə alınmayıb. Hər halda bu barədə Dövlət Komitəsinin saytında heç bir məlumata rast gəlinmir.

Məlumata görə obyekdə tikinti işləri yekunlaşdıqdan sonra sənədləşdirmə işləri aparılacaq.

Qeyd edək ki, son zamanlar Xətai rayonunda qanunsuz tikintilər geniş vüsət alıb. Maraqlıdır ki, bu qanunsuz obyektlərin əksəriyyəti dövlət rəhbərliyi tərəfindən xüsusi himayəyə alınmış "veteran", "qazi", "şəhid ailəsi" kimi imtiyazlı şəxslərin adından istifadə edərək inşa edilir.

Xətai rayonunda qanunsuz tikintilərə icra başçısının yaxın dostu kimi tanınan, rayon Mənzil Kommunal Təsərrüfat Birliyinin rəis müavini İntiqam Cümşüdovun nəzarət etdiyi bildirilir.

Məsələ ilə bağlı Xətai rayon İcra Hakimiyyətindən mövqe öyrənməyə çalışsaq da, qarşı tərəf heç bir açıqlama vermədi.