Zati-aliləri, möhtərəm cənab Prezident!

Hörmətli cənab Prezident! Sizə dərin hörmət və inam hissi ilə müraciət edirəm. Ədalətin, insan hüquq və azadlıqlarının təminatçısı olan şəxsiyyətinizə sonsuz ümid bəsləyərək, başıma gəlmiş ədalətsizliyin aradan qaldırılması üçün Sizin birbaşa müdaxilənizi xahiş edirəm.

03 fevral 2022-ci il tarixində Bakı şəhəri Yasamal Rayon Polis İdarəsinin müstəntiqi Mikayıl Qiyasovun təqdimatı və Yasamal rayon prokuroru Elman Süleymanovun qərarı ilə Cinayət Məcəlləsinin 178.3.2 və 320.1-ci maddələri ilə əsassız olaraq həbs olunmuşam. İstintaq zamanı təqdim olunan sübutlar əsassız, ziddiyyətli və qeyri-müəyyən olmuşdur. Məhkəməyə təqdim edilən ittiham aktı heç bir hüquqi tutarlılığa malik olmadan, əsaslı müdafiə vəsatətlərim nəzərə alınmadan, məhkəmə tərəfindən obyektiv araşdırma aparılmadan qəbul edilmişdir.

Bakı Ağır Cinayətlər Məhkəməsində (hakimlər: İlham Mahmudov, Faiq Qəniyev və Məhəmməd Əkbərov) keçirilən bir illik məhkəmə prosesi ərzində təqdim etdiyim sübut və vəsatətlər diqqətdən kənarda saxlanılmış, ziddiyyətli ifadələrə və aydın faktlara baxmayaraq, mənə qarşı ədalətsiz hökm çıxarılmışdır.

İş üzrə zərərçəkmiş şəxs “Geokon” MMC-nin rəhbəri Aftandil Əsədov ifadəsində məni tanımadığını, pulu isə tanışı Vahid Mahmudova verdiyini bildirmişdir. Vahid Mahmudov isə ifadəsində mənimlə 2021-ci ilin fevral ayında tanış olduğunu və mənə cəmi 30.000 manat verdiyini göstərmişdir. Həmin ifadə hökmün 6/20-ci səhifəsində də öz əksini tapmışdır. Belə olan halda, ittiham olunduğum maddənin — CM-nin 178.3.2 deyil, daha yüngül maddə olan 178.2.4 ilə tövsif olunmalı olduğu açıq-aşkar idi. Lakin bu əsaslar nəzərə alınmadan mənə 8 il azadlıqdan məhrumetmə cəzası verildi.

Apellyasiya instansiyası (hakimlər: Elmar Rəhimov, Fərid Əyyubov və Emin Mehdiyev) birinci instansiya məhkəməsinin qərarını demək olar ki, dəyişmədən qüvvədə saxlamış, yalnız 320.1-ci maddəyə xitam verməklə kifayətlənmişdir. Kassasiya şikayətimə Ali Məhkəmənin Cinayət Kollegiyası (hakim İlqar Qılıncovun sədrliyi ilə) tərəfindən baxılmış və 27 fevral 2025-ci il tarixində heç bir əsaslı hüquqi araşdırma aparılmadan əvvəlki hökm qüvvədə saxlanılmışdır. Qeyd etdiyim vəsatətlərin heç biri müzakirə olunmamış, müdafiə hüququm kobud şəkildə pozulmuşdur.

Zati-aliləri!

Bu cinayət işində təkcə mənim hüquqlarım deyil, həm də Azərbaycan Respublikasının Konstitusiyasının 63 və 127-ci maddələri, habelə CPM-nin 138.2, 177.3.5, 299.4.1, 318.1, 302.1, 397, 399, 416, 419.5, 419.10.2 və 427.4-cü maddələrinin tələbləri kobud şəkildə pozulmuşdur.

Zərərçəkmiş qismində tanınan Vahid Mahmudov həm istintaq, həm də məhkəmə proseslərində bir-birini təkzib edən, ziddiyyətli və yalan ifadələr vermişdir. Bu hərəkətləri Cinayət Məcəlləsinin 297.2-ci maddəsinə uyğun hüquqi məsuliyyət doğursa da, bu günə qədər nə istintaq, nə də məhkəmə orqanları tərəfindən heç bir hüquqi qiymət verilməmişdir.

Zati-aliləri!

Artıq 3 ildən çoxdur ki, mən bu ədalətsizliyə qarşı mübarizə aparıram. Bu müddət ərzində 9 dəfə Baş Prokurorluğa, 4 dəfə Bakı şəhər Prokurorluğuna, 7 dəfə Məhkəmə-Hüquq Şurasına yazılı şəkildə müraciət etmişəm. Təəssüf ki, aldığım cavablar yalnız formal xarakter daşıyır, məsələ üzrə hər hansı obyektiv araşdırma aparılmamışdır.

Ən acınacaqlısı isə odur ki, mən çox ağır xəstəliklərdən əziyyət çəkirəm — şəkərli diabet, ürək çatışmazlığı, sinir zədələnməsi, mədə qastriti, nevroloji pozuntular və sair. Bu xəstəliklərlə mənim 7 il 6 aylıq cəzanı başa vurmağım fiziki cəhətdən mümkün deyil. Bu cəza mənim üçün ömürlük həbsə bərabərdir.

Möhtərəm cənab Prezident!

Ən son ümidim Sizədir. Mən Dövlətimə, onun rəhbərinə inanıram. Lakin ədalət axtarışım məni artıq beynəlxalq instansiyalara yönləndirməkdədir. Bununla belə, mən Avropa Məhkəməsinə müraciət edib Azərbaycan Respublikasının hüquq sisteminə kölgə salmaq istəmirəm. Mənə qarşı ədalətsizlik edən azsaylı məmurların yanlışlığına görə doğma ölkəmin nüfuzuna zərər gəlməsini istəmirəm.

Odur ki, Sizdən xahiş edirəm:

Ali Məhkəmənin 27.02.2025-ci il tarixli qərarının Azərbaycan Respublikası CPM-nin 427.4 və 425.2-ci maddələrinə uyğun olaraq ləğv edilməsinə və işə yenidən baxılması üçün göstəriş verilməsinə dair aidiyyəti üzrə tapşırıq verməyinizi xahiş edirəm.

Əvvəlcədən Sizə dərin təşəkkürümü bildirir, ədalətin bərpasına ümid edirəm.

Hörmətlə,
Əliyev Etibar Xasay oğlu
21 iyul 2025-ci il