Azərbaycan məhkəmə sistemində görünməmiş bir hadisə baş verib: Şamaxı Rayon Məhkəməsində Hüseynov Şirin Şirinalı oğlu tərəfindən... diqqət! – Tusi adına Şamaxı Astrofizika Rəsədxanasına qarşı aliment tələbi ilə bağlı mülki iş icraata qəbul olunub!
Bəli, səhv oxumadınız. Bu dəfə ulduzlardan taleyini axtaran alimlər, Yupiterin peyklərinə baxa-baxa övlad xərcləri ilə bağlı cavabdeh kürsüsünə oturdulublar.

Məhkəmənin “ulduzlararası” qərarı

Şamaxı Rayon Məhkəməsinin hakimi Natiq İsmayılov, təbiət elmləri ilə məşğul olan bir elm müəssisəsini aliment məsələsində cavabdeh etməklə, “mülki hüququn orbitini” yerindən oynadıb. Qərarda yazılıb ki, cavabdeh – yəni “Azərbaycan Respublikası Elm və Təhsil Nazirliyi – Tusi adına Şamaxı Astrofizika Rəsədxanası” – 25 iyul 2025-ci ildə məhkəmə qarşısına çıxmalı və... uşaq baxımı ilə bağlı hesabat verməlidir.
Bəs görəsən, hakim bu qərarı çıxararkən hansı "astronomik düşüncə sferasında" gəzişib?

– Aliment öhdəliyi adətən fiziki şəxsə, yəni valideynə qarşı tutulur. İndi isə sual yaranır:
Şamaxı Rəsədxanası hansı ulduz altında bu öhdəliyə sahib olub?
Yoxsa hansısa planetdə evlənib-boşanıb da, bizim xəbərimiz yoxdur?
Daha vacib məsələ: Əgər bu tələb təmin olunsa, ödəniş hansı fondan ediləcək?
– “Kosmik aliment fondu”?
– Yoxsa “Ulduzlara baxıb övlad sahibi olan alimlər üçün ehtiyat büdcəsi”?

Bu qərar bizə bir daha göstərdi ki, bəzən süni intellektdən deyil, süni iddialardan qorxmaq lazımdır. Əgər hüquqi şəxsə – özü də dövlət elmi müəssisəsinə qarşı aliment tələbi irəli sürülürsə, sabah bəlkə də Kənd Təsərrüfatı Nazirliyi inək saxlamaq öhdəliyindən boyun qaçırmaqda, yaxud “Azəristiliktəchizat” körpəni soyuqda saxlamaqda təqsirləndiriləcək.

Nəticə etibarı ilə bu qərar bir sualı açıq qoyur:
Əgər rəsədxana uşaq baxımı xərclərini ödəməlidirsə, bəs uşaq hansı qalaktikada doğulub?
İndi isə ulduzlara yox, məhkəmə iclasına baxmağın vaxtıdır. Ola bilsin ki, bu dəfə planetlərin düzülüşü deyil, qanunların dizilişi nizamlı olmayıb...