Azərbaycan Milli Elmlər Akademiyasının Mərkəzi Elmi Kitabxanasında Milli Musiqi Gününə həsr olunmuş sərgi təşkil edilib.

AMEA Mərkəzi Elmi Kitabxanasından BNTV.az-a verilən məlumata görə, sərgidə Azərbaycan musiqi mədəniyyətinin zəngin tarixini, milli musiqi irsini, muğam və aşıq sənətini, xalq mahnılarını, milli musiqi alətlərini, eləcə də görkəmli bəstəkarların yaradıcılığını əks etdirən çoxsaylı nəşrlər nümayiş olunur.

Qeyd edək ki, Ümummilli Lider Heydər Əliyevin 1995-ci ildə dahi bəstəkar Üzeyir Hacıbəylinin anadan olmasının 110 illik yubileyi ərəfəsində imzaladığı Fərmana əsasən, hər il sentyabrın 18-i Azərbaycanda Milli Musiqi Günü kimi qeyd edilir.

Bu əlamətdar gün münasibətilə hazırlanan sərgidə “Azərbaycan musiqi tarixi”, “Azərbaycan muğamı miniatürlərdə”, “Muğam ensiklopediyası”, “Saz məktəbi”, “Azərbaycan xalq mahnıları” ikicildliyi, “Ozan-aşıq dünyası”, “Azərbaycan musiqi alətləri” və digər qiymətli nəşrlər yer alıb.

Ekspozisiyada dahi bəstəkar Üzeyir Hacıbəylinin operaları, operettaları, felyetonları və publisistik əsərlərinin toplandığı kitablar, həmçinin onun həyat və yaradıcılığına həsr edilmiş elmi və biblioqrafik nəşrlər də təqdim olunur.

Sərgidə görkəmli bəstəkar Fikrət Əmirovun yaradıcılığına həsr olunan çoxcildliklərə də geniş yer ayrılıb. Həmin nəşrlərdə bəstəkarın opera, balet, simfonik muğam və mahnı janrlarında yaratdığı əsərlər, eləcə də Azərbaycan professional musiqi sənətinin inkişafına verdiyi töhfələr əksini tapıb.

Bundan başqa, Mərkəzi Elmi Kitabxananın hazırladığı “Akademik Üzeyir Hacıbəyli” biblioqrafiyası, həmçinin Azərbaycanın tanınmış musiqişünasları, xanəndələri və bəstəkarlarına həsr olunan müxtəlif kitablar da ziyarətçilərə təqdim edilir.

Milli Musiqi Gününə həsr olunmuş sərgi iki həftə davam edəcək. Sərgidə nümayiş olunan nəşrlərlə Mərkəzi Elmi Kitabxananın Elektron kitabxana bölməsi vasitəsilə onlayn tanış olmaq da mümkündür.