Xəzər dənizi illərdir insan fəaliyyəti nəticəsində ekoloji fəlakətə doğru sürüklənir.

Məlumata görə sənaye tullantıları, idarə olunmayan məişət çirkabları, sahilboyu qaydasız inşaat işləri dənizi boğur.

Xəzərə axıdılan çirkab, hətta zəhərli sular dənizin canlı aləmini məhv etməklə yanaşı, insan sağlamlığı üçün də ciddi təhlükə yaradır. Yay mövsümündə insanların ən çox üz tutduğu Xəzər qoynundakı çimərliklərdən biri də Şıx qəısəbəsi ərazisindədir. İnsanları üz tutduğu bu məşhur çimərlik sahilboyu saf qumu, təmiz suyu ilə adı çıxarsa da, hazırda durum başqadır. Şıx çimərliyinin qonşuluğundan dənizə çirkab suların axıdılması haqda sosial şəbəkələrdə videogörüntülər yayılıb.

Videoda “Ramada” hotelindən Xəzərə birbaşa olaraq çirkab suların axıdıldığı aydın görünür. Kadrları çəkən şəxsin şərhindən belə aydın olur ki, Xəzərə axıdılan çirkab sulardan üfunət iyi gəlir, bu axıntının günün müxtəlif vaxtlarında, xüsusilə də gecə saatlarında daha intensiv olduğu aydın olur. Videodan o də bəlli olur ki, otel yay mövsümü boyu minlərlə istirahətçini qəbul etsə də, tullantı sularının təhlükəsiz şəkildə idarə olunması təmin edilmir. Bu isə çimərlik ərazisində dəniz suyunun təmizliyinə ciddi təhlükə yaratmaqla insanların sağlamlığını təhdid edir.

2006-cı ildə Prezident tərəfindən “Xəzər dənizinin dəniz ətraf mühitinin mühafizəsi haqqında” Çərçivə Konvensiyası təsdiqlənib. 2003-cü il noyabrın 4-də Tehran şəhərində imzalanan sənədin birinci maddəsində açıq şəkildə qeyd olunur ki, dəniz canlılarının həyatı, bioloji ehtiyatlar və insan sağlamlığı üçün təhlükə törədən, yaxud törədə biləcək istənilən maddənin dəniz mühitinə daxil edilməsi yolverilməzdir.

Ekologiya və Təbii Sərvətlər Nazirliyinin sahilboyu ərazilərdə apardığı monitorinqlər zamanı Xəzərə 128 mənbədən suyun axıdıldığı faktı qeydə alınıb. Rəsmi məlumatlar göstərir ki, qanunla qadağan olunmasına və dəfələrlə xəbərdarlıqlar edilməsinə baxmayaraq, bəzi obyekt sahibləri bu tələbləri hələ də gözardı edir və dənizə çirkab sularını ötürməkdə davam edirlər.Musavat.com

VİDEO LİNKDƏ: https://xalq.online/ramada-hotelinden-xezere-birbasa-olaraq-cirkab-su-axidilir-video