Qusar şəhəri, Hacı Məhəmməd küçəsində yaşayan təqaüdçü Ağamirzəyev Hacımirzə Ağamirzə oğlu Azərbaycan Respublikasının Maliyyə naziri Sahil Babayevə müraciət edərək, dövlət büdcəsinə səhvən köçürdüyü 50 manat rüsumun geri qaytarılmamasından şikayətlənib.

Ərizədə qeyd olunur ki, vətəndaş 30.05.2024-cü il tarixində Ali Məhkəməyə kassasiya şikayəti vermək məqsədilə səhvən 1464925888 nömrəli qəbzlə dövlət rüsumu ödəyib. Lakin sonradan Sumqayıt Apellyasiya Məhkəməsi tərəfindən 22.04.2025-ci il tarixində qərardad çıxarılaraq bu məbləğin vətəndaşa geri qaytarılması qərara alınıb.

Buna baxmayaraq, üzərindən bir ildən çox vaxt keçsə də, həmin vəsait nə Maliyyə Nazirliyi tərəfindən vətəndaşa qaytarılıb, nə də Kapital Bank ASC-nin hesabına köçürülüb.

Ağamirzəyev Hacımirzə bildirir ki, dəfələrlə məsələ ilə bağlı müraciətlər etsə də, nəticə yoxdur və məsələ naməlum səbəblərlə gecikdirilir. O, Maliyyə naziri Sahil Babayevə müraciətində səhvən köçürülmüş vəsaitin geri qaytarılması üçün aidiyyəti üzrə göstəriş verilməsini xahiş edir.

Bakunews.az məsələni diqqətdə saxlayacaq və Maliyyə Nazirliyindən rəsmi cavab olacağı təqdirdə dərc etməyə hazırdır.