Azərbaycanın siyasi tarixində uzun illər “boz kardinal” kimi tanınan Ramiz Mehdiyev haqqında son aylarda yayılan məlumatlar onun təkcə siyasi yox, həm də iqtisadi təsir dairəsi ilə bağlı sualları yenidən gündəmə gətirdi. Onun barəsində aparılan istintaqın miqyası, həmçinin mətbuatda yer alan iddialar Mehdiyevin illər boyu qurduğu əlaqələr şəbəkəsini yenidən müzakirə mövzusuna çevirdi.

Müxtəlif media resurslarında yayılan məlumatlara görə, Ramiz Mehdiyev uzun müddət təkcə dövlət idarəçiliyində deyil, həm də strateji biznes sahələrində, xüsusilə gömrük və daşınma sektorunda böyük təsir imkanlarını saxlayıb.

İddialara görə, onun adı “Karqo Şamil” kimi tanınan sahibkarın biznes çevrəsi ilə, o cümlədən “Şah Kargo” və “Çin Kargo” adlı şirkətlərlə əlaqələndirilir. Bu şirkətlər bir sıra gömrük və logistika əməliyyatlarında onun siyasi çəkisindən yararlandığı barədə məlumatlar dövriyyədədir. Bu iddialar əvvəllər mediada qısa müddət rezonans doğursa da, sonradan səngidi. Lakin indi həmin şirkətlərin yenidən fəallaşması və gömrükdə müşahidə olunan bəzi köhnə problemlərin aktuallaşması bu əlaqələri yenidən gündəmə gətirib.

Son aylarda ölkə ictimaiyyətində gömrük orqanlarında bəzi köhnə sxemlərin yenidən canlanması barədə müzakirələr güclənib. Əgər bu iddialar tsdiqini tapsa, deməli, Ramiz Mehdiyevin keçmiş təsir dairələri hələ də tamamilə zərərsizləşdirilməyib. Bu isə dövlətin iqtisadi təhlükəsizliyi baxımından ciddi məsələdir.

Həmçinin İdxal-İxrac İdarəsinin rəhbəri Azər Məmmədovun adı da əsas müzakirələrdə çəkilir. Onun bəzi qeyri-qanuni şirkətlərin fəaliyyətinə göz yumması, bu şirkətlərin dövlət büdcəsinə zərər vurması barədə məlumatlar mövcuddur.

Məmmədovun sabiq Təhsil naziri Misir Mərdanovun kürəkəni olması da bu məsələyə ictimai marağı artırır. Mərdanovun vaxtilə Ramiz Mehdiyevlə siyasi qarşıdurmada olduğu bildirilir. Bu fakt, Mehdiyevin və ya onun çevrəsinin hələ də bu idarələrə dolayı təsir göstərib-göstərmədiyi sualını aktuallaşdırır.

Gömrük sistemində baş verən proseslərdə əsas məsuliyyət, təbii ki, qurumun rəhbəri Şahin Bağırovun üzərinə düşür. Son illər Bağırovun idarəçiliyi dövründə bir sıra islahatlar həyata keçirilsə də, qeyri-şəffaf fəaliyyət göstərən şirkətlərin hələ də sistemdə yer alması suallar doğurur.

Hazırda cəmiyyətdə gözlənti ondan ibarətdir ki, həm Şahin Bağırov, həm də Azər Məmmədov rəhbərlik etdikləri qurumlarda bu kimi köhnə əlaqələrin tam aradan qaldırılması üçün konkret addımlar atsınlar.

Ramiz Mehdiyevin uzun illər ərzində formalaşdırdığı siyasi və iqtisadi şəbəkənin hələ də bəzi strukturlarda təsir izləri qalırsa, bu, təkcə keçmişin mirası deyil, həm də indiki sistem üçün ciddi təhlükədir.

Bu səbəbdən istintaqın yalnız Ramiz Mehdiyevin şəxsi fəaliyyətini deyil, onun illər ərzində formalaşdırdığı təsir dairələrinin də dərinliyinə enməsi vacibdir. Əgər məqsəd köhnə sistemin qalıqlarını təmizləməkdirsə, bu, gömrükdən başlamalıdır.

Bizimxeber.org