Abşeron rayonunda yağan intensiv yağışlar nəticəsində yaranmış subasma hallarının aradan qaldırılması istiqamətində aidiyyəti qurumlar tərəfindən kompleks tədbirlər həyata keçirilir. Rayon rəhbərliyi vəziyyəti yerində qiymətləndirmək və görülən işlərlə yaxından tanış olmaq məqsədilə ərazilərə baxış keçirib.

Abşeron Rayon İcra Hakimiyyətinin başçısı Abdin Fərzəliyev, Azərbaycan Dövlət Su Ehtiyatları Agentliyinin Regional Su Meliorasiya PHŞ-nin İdarə Heyətinin sədri Zakir Quliyev və digər məsul şəxslər rayon ərazisində su basmış sahələrdə olublar. Baxış zamanı yağışın yaratdığı fəsadların aradan qaldırılması üçün görülən işlərin gedişi qiymətləndirilib, operativliyin artırılması ilə bağlı tapşırıqlar verilib.

RİH başçısı fəaliyyətində qısamüddətli nasazlıq yaranmış 26 saylı mərkəzləşdirilmiş nasosxanada aparılan bərpa işləri ilə də maraqlanıb. Bildirilib ki, baş vermiş texniki nasazlıq artıq aradan qaldırılıb və nasosxana hazırda gücləndirilmiş iş rejimində fəaliyyət göstərir. Bu isə ərazilərdə yığılan suyun daha sürətli şəkildə kənarlaşdırılmasına imkan yaradır.

Rəhbərlik, həmçinin Xırdalan şəhəri və Məmmədli kəndində subasma müşahidə olunan bir sıra ünvanlara baş çəkərək yerli sakinlərlə görüş keçirib. Görüşlər zamanı vətəndaşların problemləri dinlənilib, mövcud vəziyyətin qısa müddətdə aradan qaldırılması üçün əlavə tədbirlərin görüləcəyi bildirilib. Xüsusilə, suyun daha tez çəkilməsi üçün əlavə nasosların cəlb olunması və digər zəruri addımların təxirəsalınmadan həyata keçirilməsi ilə bağlı konkret göstərişlər verilib.

Bununla yanaşı, gələcəkdə bu kimi halların təkrarlanmaması üçün qabaqlayıcı tədbirlərin gücləndirilməsinin vacibliyi vurğulanıb. Aidiyyəti qurumlara yağış sularının axıdılması sistemlərinin təkmilləşdirilməsi, riskli ərazilərdə monitorinqlərin aparılması və müvafiq infrastrukturun yenilənməsi ilə bağlı tapşırıqlar verilib.

Hazırda Abşeron rayonunun subasmaya məruz qalmış ərazilərində vəziyyətin sabitləşdirilməsi istiqamətində işlər davam etdirilir. Bu prosesdə Abşeron Rayon İcra Hakimiyyəti, yerli bələdiyyələr, Fövqəladə Hallar Nazirliyinin və Dövlət Su Ehtiyatları Agentliyinin yerli strukturları birgə fəaliyyət göstərərək yaranmış fəsadların operativ şəkildə aradan qaldırılmasına çalışırlar.