Bakıda uşaqların işgəncələrə məruz qaldığı mərkəz barədə bir sıra faktlar üzə çıxıb.


bakunews.az trend-ə istinadən xəbər verir ki, "Mehnur" reabilitasiya mərkəzinin rəhbəri defektoloq-loqoped Nuranə Hacızadədir.

Mərkəzin Xırdalan şəhərində, Nəsimi, Nizami rayonlarında və Binə qəsəbəsində olmaqla 4 fərqli ünvanda filialları fəaliyyət göstərir.

Uşaqlara işgəncə verilməsi ilə bağlı görüntülər isə "Mehnur" reabilitasiya mərkəzinin Nizami rayonu, Neftçilər metrosunun yaxınlığı, R.Rüstəmov 50 A. ünvanında yerləşən filialında baş verib.

Mərkəzin rəhbəri Nuranə Hacızadə mütəxəssis kimi televiziya proqramlarında və təlimlərdə iştirak edib.

Qeyd edək ki, sosial şəbəkələrdə yayılan görüntülərdə "Mehnur" reabilitasiya mərkəzində uşaqlara işgəncə verilməsi ilə bağlı kadrlar əks olunub.

DİN-in Mətbuat Xidmətinin KİV və ictimaiyyətlə əlaqələr şöbəsinin rəisi, polis mayoru Elşad Hacıyev bildirib ki, özəl loqoped mərkəzində uşaqlara işgəncə verənlərin kimliyi məlum olub. Araşdırmalar davam etdirilir. Əlavə məlumat veriləcək.

Səhiyyə Nazirliyindən isə qeyd olunub ki, yetkinlik yaşına çatmayanların işləri və hüquqlarının müdafiəsi üzrə komissiyanın alt işçi qrupunda bu görüntülərlə bağlı araşdırmalar aparılır. Komissiya Səhiyyə Nazirliyi,Daxili İşlər Nazirliyi, Respublika Baş Prokurorluğu, Ailə Qadın və Uşaq Problemləri üzrə Dövlət Komitəsi, QHT-lər və digər aydiyyatı qurumların nümayəndələrindən ibarətdir. Araşdırmalar başa çatdıqdan sonra komissiya nəticələr barədə məlumat yayacaq.

bakunews.az