Avqustun 2-3-də Kiyev Apellyasiya Məhkəməsində Azərbaycan vətəndaşı, İkinci Qarabağ müharibəsi iştirakçısı Misir Qasımlı və onunla birgə ittiham olunan Sübhan Quliyevin işi üzrə məhkəmə iclası keçirilib.

bakunews.az report-a istinadən xəbər verir ki, proseslərdən biri azərbaycanlıların vəkili Valeri Dobroneysi şikayəti, digəri isə Ukrayna Azərbaycanlıları Birləşmiş Diasporu (UABD) təşkilatının müraciəti əsasında baş tutub.

Vəkilinin iddiası ilə avqustun 2-də toplanan məhkəmə prosesi Kiyevdə verilən növbəti hava həyəcan siqnalı ucbatından növbəti həftəyə təxirə salınıb. Digər prosesdə isə diaspor təşkilatının azərbaycanlı təqsirləndirilənlərin zaminə buraxılması tələbi yenə də təmin olunmayıb. Hər iki müraciətdə əvvəlki proseslərdən narazılıq bildirilərək hələ də günahı sübuta yetirilməyən azərbaycanlılar barədə son məhkəmə qərarının verilməsi tələbi irəli sürülüb.

Bu prosesdə də UABD-nin azərbaycanlı qazinin zaminə buraxılması ilə bağlı iddiası təmin edilməyib. Kiyevdə olan təşkilatın sədr müavini Elşad İbrahimov bildirib ki, bu səbəbdən artıq zaminlik iddiasından vaz keçərək qazinin azad edilməsi üçün başqa hüquqi yol seçəcəklər.

Əvvəlki proseslərdən fərqli olaraq bu dəfəki prosesdə iştirak edən təqsirləndirilən azərbaycanlı qazi Misir Qasımlı qeyd ki, 1 ildir ona qarşı irəli sürülən ittihamlar sübuta yetirilməyib, məhkəmə son qərar da vermir: "Prokuror açıq-aşkar bildirir ki, Qarabağ qazisi başkəsəndir, onu buraxmaq olmaz". Qazi və yaxınları bu işin arxasında erməni lobbisinin olduğunu vurğulayırlar.

Qeyd edək ki, azəbaycanlılar Kiyevdə ərəbmənşəli İspaniya və Britaniya vətəndaşı olan iş adamının şikayəti əsasında saxlanılıb. Onlara qarşı adam oğurluğuna cəhd və soyğunçuluq maddələri irəli sürülsə də, 1 ildir sübut olunmur. M.Qasımlı və S.Quliyev Ukraynada paytaxt Kiyevdə istintaq təcridxanasında saxlanılırlar.

M.Qasımlı "Kəlbəcərin azad olunmasına görə" medalı ilə təltif olunub.

bakunews.az