Rusiya "Naftoqaz"ın qaz hasilatı obyektlərinə silsilə zərbələr endirib
Rusiya qoşunları son günlər ərzində Xarkov vilayətində "Ukrayna Naftoqaz" qrupunun qaz hasilatı obyektlərinə zərbələr endirib, nəticədə avadanlıqların bir hissəsi istismardan çıxarılıb.
Bu barədə "Ukrayna Naftoqaz" qrupundan bildirilib.
Şirkətin məlumatına görə, iyulun 19-da hasilat obyektlərindən biri zərbəyə məruz qalıb, bundan sonra yanğın baş verib. Yanğın operativ şəkildə söndürülüb. Avadanlığın zədələnməsi səbəbindən qaz hasilatının bir hissəsi müvəqqəti olaraq dayandırılıb.
Bildirilib ki, iyulun 20-si Rusiya qoşunları daha bir qaz hasilatı obyektinə hücum edib. Çoxsaylı dağıntılar qeydə alınıb.
"Naftoqaz"ın məlumatına görə, hər iki hücum zamanı əməkdaşlar sığınacaqlarda olublar, xəsarət alan yoxdur.
Şirkətdən əlavə edilib ki, mütəxəssislər artıq hücumların nəticələrinin qiymətləndirilməsi və zədələnmiş infrastrukturun bərpası üzərində işləyirlər.
Əlaqə whatsapp:+994 70 402 02 85
BakuNews.az
