ABŞ-ın geniş oxucu kütləsinə malik nüfuzlu “Frontpage Magazine” jurnalında “İranın etnik qruplarının iztirabları” sərlövhəli məqalə dərc olunub.
Tanınmış israilli politoloq və jurnalist, Dona Qrasiya Diplomatiya Mərkəzinin təsisçisi və baş direktoru Reyçel Avrahamın qələmə aldığı məqalədə bildirilir ki, 2022-ci ilin noyabrından 2023-cü ilin martınadək İran İslam Respublikasında 7000-ə qədər qızın zəhərləndiyi aşkar edildikdən sonra iranlılar ayətullah rejiminə yeni güclə etiraz etməkdədirlər. Şiələrin müqəddəs şəhəri Qumda baş verən bu zəhərlənmələr daha sonra ölkənin bütün bölgələrinə yayılsa da, yaşadıqları bölgələrdə tibbi xidmətin inkişafdan qaldığı azərbaycanlılar, bəluclar, kürdlər və ərəblər bu bəladan ən çox zərər çəkən etnik qruplar sırasındadır.
Məqalədə bu günlərdə 500-ə qədər Güney azərbaycanlı və onların tərəfdarlarının sözügedən məsələyə diqqəti cəlb etmək üçün Avropa Parlamenti qarşısında etiraz aksiyası keçirdiyi diqqətə çatdırılıb. Güney azərbaycanlı fəallar Saleh Kamrani və Şərifə Cəfəri tərəfindən təşkil olunan və “İran üçün Azadlıq və Ədalət Toplantısı” şüarı altında keçirilən aksiyada İranda yaşayan qeyri-fars xalqların nümayəndələri, Ukrayna diasporunun üzvləri, Azlıqların Müdafiəsi üzrə Avropa jurnalistləri və Avropa Assosiasiyasının təmsilçiləri iştirak etmişlər. Qeyd olunub ki, sözügedən dinc nümayiş Güney azərbaycanlıların İran İslam Respublikasının qeyri-fars xalqları qərar qəbul etmənin bütün sahələrindən kənarlaşdırmaqda və onlar haqqında dezinformasiya yaymaqda ifadə olunan siyasətini ifşa etmək üçün təşkil olunub. Müəllif güneyli soydaşlarımızın molla qaragüruhunun idarə etdiyi ölkədə dəyişiklik etmək, irqçiliyi ifşa etmək və öz danışılmamış hekayələrini dünyanın diqqətinə çatdırmaq əzmində olduğunu vurğulayıb.
Aksiya iştirakçıları "İran daxilindəki bütün qeyri-fars xalqlar, eləcə də SEPAH zorakılığının qurbanı olmuş qadınlar və gənclər üçün ədalət və azadlıq" tələb edib, molla rejimi tərəfindən etirazçıların həbsini və siyasi dissidentlərin edamını, Ukraynada mülki şəxslərə qarşı İranın pilotsuz təyyarələrindən istifadə olunmasını pisləyib, habelə Avropa İttifaqını İranın nüvə silahı əldə etməsinin qarşısını almağa çağırıblar.
Məqalədə etiraz aksiyasının təşkilatçısı Saleh Kamraninin müsahibəsindən iqtibas gətirilib: “İnqilabın yükü fars olmayan xalqların çiynindədir. İran əhalisinin 40 faizindən çoxunu təşkil edən azərbaycanlılar tamamilə dinc xarakter daşıyan hərəkata rəhbərlik edirlər. Qeyri-fars xalqların iştirakı olmadan rejim dəyişikliyi demək olar ki, mümkün deyil. Əgər dünya qeyri-fars xalqların reallığına və əhəmiyyətinə məhəl qoymamağa davam edərsə, bu, İranda vətəndaş müharibəsinə, hətta ayətullahların nüvə bombası əldə etməsinə səbəb olacaq”.
Məqalədə Əhvaz Ərəb Hərəkatının sədri Səid Həmidanın fikirləri də yer alıb: “Əhvazlı olaraq rejimin devrilməsinin azərbaycanlılar, bəluclar, kürdlər daxil olmaqla bütün qeyri-fars xalqların mübarizəsinin koordinasiyası yolu ilə mümkünlüyünə inanıram və bu məqsədlə indiki rejimə qarşı mövqeyimizi gücləndirmək üçün bütün xalqlarla ittifaq yaratmışıq. Biz əminik ki, düzgün yoldayıq və diplomatik baxımdan siyasi tarazlığın bir hissəsi ola bilərik. Buna görə də qeyri-fars xalqlar bizimlə gələcək haqqında, beynəlxalq ictimaiyyətlə əlaqələrimizi yaxşılaşdırmağın ən münasib yolu barədə danışıqlar aparırlar”.
İran rejiminin “güzgüdə özünə yaxşı-yaxşı tamaşa etmək” əvəzinə sözügedən etirazları İsrail və Azərbaycanın ayağına yazmasını qınayan müəllif bu yaxınlarda ölkəmizin Təl-Əvivdə səfirliyinin təntənəli açılışının molla rejiminin revanşist hisslərini daha da gücləndirəcəyini proqnozlaşdırıb.

Məqaləni ətraflı şəkildə aşağıdakı linkdən oxumaq mümkündür:
https://www.frontpagemag.com/the-suffering-of-irans-ethnic-groups/