By Mahsati” adlı gözəllik salonu müştəriləri aldatmaqla məşğuldur. Azadmedia.az xəbər verir ki, bu barədə jurnalist Zülfiyyə Qurbanova sosial media hesabında paylaşıb: ““By Mahsati” adlı gözəllik salonu xanımları müxtəlif kampaniyalarla cəlb edir, lakin vədlərinə əməl etmir”.
Onun sözlərinə görə, salon piyləri parçalayan aparat və dietik menyu ilə müştərilərə arıqlama proqramı təklif edir, lakin prosedurlar üçün əvvəlcədən ödəniş tələb olunur. Lakin ödəniş edildikdən sonra müştərilər saatlarla gözlədilir, xidmət keyfiyyəti isə vəd edilən səviyyədə olmur:

“İlk gündə bizi gözlətsələr də, anlayışla qarşıladıq. Amma gözlədiyimiz müddətdə administratora gələn zənglərdən anladım ki, bizdən başqa da çoxlu narazı müştəri var. Fərqli xanımlar pullarını geri istəyirdi. İkinci dəfə isə vəziyyət daha da acınacaqlı idi. Təyin olunan saatdan xeyli keçsə də, növbəyə alınmırdıq. Müştərilər saatlarla əsəbi halda gözləyirdi”.

Qurbanova bildirib ki, uzun gözləmədən sonra pulunu geri tələb edib. Salon rəhbərliyi və əməkdaşları buna razılıq versələr də, ödənişin hələ də qaytarılmadığını deyir:

“Pulu axşam karta atacaqlarına söz verdilər. Amma nə axşam, nə də gecə puldan xəbər çıxdı. Şəhərin mərkəzində açıq-aşkar dələduzluq yolu ilə cibimizə girirlər”.