Abşeron rayonunun Novxanı kəndi, Gəray Əsədov küçəsinin sakinləri artıq bir neçə aydır yol problemi ilə üz-üzə qalıblar.

Sakinlərin bildirdiyinə görə, bir müddət əvvəl küçənin giriş hissəsində ev alan şəxs yaşadığı mənzilə kanalizasiya xətti çəkmək məqsədilə asfalt örtüyünü qazaraq yararsız vəziyyətə salıb. Aparılan qazıntı işlərindən sonra isə yol əvvəlki vəziyyətinə qaytarılmayıb.

Nəticədə yüz metrlərlə məsafədə asfalt örtüyü sıradan çıxıb, həm piyadaların, həm də avtomobillərin hərəkəti ciddi şəkildə çətinləşib. Yağışlı havalarda küçə palçıq içində qalır, quru və küləkli günlərdə isə ərazini toz-torpaq bürüyür. Beləliklə, bir şəxsin öz şəxsi ehtiyacı üçün apardığı işin fəsadını bütöv küçənin sakinləri çəkməli olurlar.

Vətəndaşların sözlərinə görə, məsələ ilə bağlı aidiyyəti qurumlara dəfələrlə məlumat verilsə də, indiyədək yol örtüyünün bərpası istiqamətində nəticə görünmür. Sakinlər ictimai istifadədə olan yolun qazılmasına kimin və hansı əsasla icazə verdiyini, qazıntı işlərindən sonra asfaltın niyə bərpa edilmədiyini və dəymiş ziyanın kim tərəfindən ödənilməli olduğunu soruşurlar.

Əgər kanalizasiya xəttinin çəkilməsi üçün yol örtüyünün qazılması zəruri idisə, işlər başa çatdıqdan sonra həmin ərazinin əvvəlki vəziyyətinə gətirilməsi də təmin edilməli idi. Şəxsi evin kommunal problemini həll etmək bütöv bir küçənin yol probleminə çevrilməməlidir.

Sakinlər ümid edirlər ki, aidiyyəti qurumlar gec də olsa məsələyə müdaxilə edəcək, küçəni faktiki olaraq qazıntı meydançasına çevirən işlərin hüquqi əsasları araşdırılacaq və dağıdılmış asfalt örtüyünün bərpası təmin olunacaq.

Ardı var...